Danska verslunarkeðjan Irma selur nú meira af Svansmerktum snyrtivörum en öðrum vörum til sömu nota. Hlutfall Svansmerktu varanna er komið í 56% af heildarsölunni, en salan á þessum vörum hefur aukist um 7% á einu ári. Trúverðugleiki Svansins og samkeppnishæft verð eru sagðar vera helstu ástæður þessarar miklu aukningar.
(Sjá frétt á heimasíðu Svansins í Danmörku 27. nóvember).
Nike kynnti á dögunum fótboltaskóinn GS2, sem fyrirtækið segir vera þann umhverfisvænsta á markaðnum. Skórinn vega aðeins um 160 g og er að talsverðu leyti gerður úr endurunnu efni og endurnýjanlegu efni sem unnið er úr plöntum. Þannig er sólinn að hluta úr kristpálmafræjum (e. castor beans) og reimar o.fl. úr allt að 70% endurunnu efni. Engu er þó fórnað í gæðum að sögn framleiðandans.
(Sjá frétt EDIE 26. nóvember).
Stokkhólmslén er það svæði í Svíþjóð þar sem mestur árangur hefur náðst í notkun endurnýjanlegs eldsneytis í almenningssamgöngum, en þar var hlutfall slíks eldsneytis komið í 65% árið 2011. Örebrolén var hins vegar fremst í flokki hvað varðar innkaup á lífrænum matvælum, en árið 2011 voru 35,4% af matarinnkaupum lénsins með lífræna vottun. Fimm önnur svæði höfðu þá náð markmiði sænska ríkisins um 25% hlutdeild lífrænna matvæla í opinberum innkaupum. Þessar tölur og margar fleiri koma fram í skýrslunni Miljönyckeltal för landsting och regioner 2012 sem kom út í vikunni.
(Sjá skýrsluna Miljönyckeltal för landsting och regioner 2012).
Í nýrri úttekt sem European Environmental Bureau (EEB) vann fyrir Umhverfisstofnun Danmerkur (Miljøstyrelsen) kemur fram að með því að láta framleiðendur rafeindatækja greiða mishá úrvinnslugjöld eftir umhverfislegu ágæti tækjanna sem þeir framleiða, megi fá þá til að leggja meiri áherslu á vistvæna hönnun. Hingað til þykir framleiðendaábyrgð á rafeindatækjum ekki hafa skilað sér í aukinni framleiðslu á umhverfisvænni tækjum, eins og þó var stefnt að þegar framleiðendaábyrgðin var innleidd með samþykkt svonefndrar WEEE-tilskipunar Evrópusambandsins. Skilagjald á lítil rafeindatæki er meðal annarra tillagna sem settar eru fram í úttektinni.
(Sjá frétt á heimasíðu Miljøstyrelsen 22. nóvember).
Í rannsókn sem gerð var nýlega á fjórum ungum konum sem þekktar eru úr sviðsljósi norskra fjölmiðla kom í ljós að allar höfðu þær nokkurt magn mengunarefna í blóðinu. Rannsóknin var gerð í samvinnu við Svaninn og tímaritið Cygnus. Þó að styrkur efnanna hafi í flestum tilvikum verið lágur, vekur þetta upp spurningar um hugsanleg áhrif, þ.á.m. samverkandi áhrif til langs tíma. Vaxandi magn ýmissa mengunarefna í blóði fólks kann m.a. að stuðla að minnkandi frjósemi og aukinni tíðni ofnæmis og krabbameins. Mörg þessara efna safnast upp í líkamanum á langri ævi og skila sér auk þess til ungbarna með móðurmjólkinni. Ekki er auðvelt að greina uppruna efnanna, en þau getur m.a. verið að finna í vörum sem fólk notar þegar það þvær hendur sínar og hár, farðar sig eða burstar tennur.
(Sjá frétt í Dagbladet 23. nóvember).
Ida Auken umhverfisráðherra Danmerkur kynnti í vikunni nýja varnaefnaáætlun dönsku ríkisstjórnarinnar undir yfirskriftinni Beskyt vand, natur og sundhed. Þar er gert ráð fyrir hröðum samdrætti í notkun varnarefna, en markmiðið er að ná fram 40% samdrætti fyrir árslok 2015. Ætlunin er að verja 253 milljónum danskra króna (rúmum 5,5 milljörðum ísl. kr.) til að ná þessu markmiði. Mikilvægur liður í áætluninni er nýtt varnarefnagjald, sem gerir það að verkum að skaðminni efni verða hlutfallslega ódýrari í innkaupum.
(Sjá frétt á heimasíðu Miljøstyrelsen 20. nóvember).
Hópur nokkurra stærstu fagfjárfesta heims hafa sent ríkisstjórnum leiðandi ríkja bréf, þar sem varað er við því að lífeyrissparnaður og fjárfestingar milljóna manna séu í hættu verði ekki gripið til markvissra aðgerða til að afstýra hættulegum afleiðingum loftslagsbreytinga. Í bréfinu er kallað eftir víðtæku samráði stjórnvalda og fjárfesta um stefnumótun í loftslagsmálum með það að markmiði m.a. að stórauka fjárfestingar í kolefnissnauðri tækni og setja metnaðarfull markmið um samdrátt í losun. Bréfið kemur í kjölfar svartrar skýrslu Alþjóðabankans um horfur í loftslagsmálum og nokkrum dögum fyrir 18. fund aðildarríkja Loftslagssamnings Sameinuðu þjóðanna í Doha.
(Sjá frétt Business Green 20. nóvember).
Margir af stærstu fataframleiðendum heims nota krabbameinsvaldandi og hormónatruflandi efni í framleiðslu sinni. Í umfangsmikilli könnun á vegum Greenpeace sem sagt var frá í gær fundust efni á borð við þalöt, nónýlfenólethoxýlat (NPE) og amín, en öll þessi efni geta haft skaðleg áhrif á heilsu og frjósemi fólks í tiltölulega litlum skömmtum. Alls var skoðuð 141 flík og reyndust 63% þeirra innihalda efni af þessu tagi. Þetta gilti jafnt um ódýrari fatamerki á borð við Zara, Jack&Jones, Only og Vero Moda – og dýrari merki á borð við Esprit og Benetton og sömuleiðis Armani og Calvin Klein. Efni sem þessi eru ekki nauðsynleg í fataiðnaði og finnast t.d. ekki í umhverfismerktum fatnaði.
(Sjá frétt á heimasíðu Greenpeace í gær).
Lánshæfismat þjóða kann að vera ofreiknað í mörgum tilvikum, þar sem matsfyrirtæki taka ekki tillit til ástands náttúruauðlinda í útreikningum sínum. Þetta kemur fram í nýrri skýrslu undir yfirskriftinni „E-RISC: A New Angle on Sovereign Credit Risk“, sem Umhverfisstofnun Sameinuðu þjóðanna (UNEP) kynnti í gær. Í skýrslunni eru sett fram fyrstu drög að svonefndri E-RISC aðferðafræði sem gæti orðið grunnur að breyttum útreikningum matsfyrirtækja. Í þessari nýju aðferðafræði er m.a. tekið tillit til vistspors viðkomandi þjóðar (e. Ecological Footprint) í samanburði við líffræðilega getu landsins (e. biocapacity).
(Sjá frétt á heimasíðu UNEP í gær).
Síðastliðinn föstudag kynnti Tony Burke, umhverfisráðherra Ástralíu, ákvörðun þarlendra stjórnvalda um stofnun þjóðgarða á nærliggjandi hafsvæðum til að vernda kóralrif og annað lífríki sjávar gegn neikvæðum áhrifum olíuleitar og fiskveiða. Þetta verður stærsta náttúruverndarsvæði heimshafanna, samtals um 2,3 milljónir ferkílómetra (u.þ.b. 23-föld stærð Íslands). Með þessu vilja stjórnvöld tryggja að fiskabúr og teiknimyndin ‘Finding Nemo’ verði ekki einu heimildirnar sem eftir verða um mikilfengleika hafanna.
(Sjá frétt PlanetArk í dag).
2020 
