Mánaðarskipt færslusafn fyrir: nóvember 2012

Bresk yfirvöld kæra eigendur Sellafield

Birt þann af
Svara

Yfirvöld í Bretlandi lögðu í gær fram 9 kærur á hendur eigendum kjarnorkuendurvinnslustöðvarinnar í Sellafield, en þeir eru sakaðir um að hafa urðað geislavirkan úrgang á svæðinu án tilskilinna leyfa. Ekki er búist við þungum refsingum vegna þessara mála, en kærurnar koma á afar óheppilegum tíma fyrir eigendur stöðvarinnar, sem sætt hafa mikill gagnrýni að undanförnu vegna lausataka í stjórnun og rekstri. Áætlað er að nauðsynlegar endurbætur á stöðinni í Sellafield myndu kosta um 67 milljarða sterlingspunda (jafnvirði tæplega 14.000 milljarða ísl. kr).
(Sjá frétt PlanetArk í gær).

Hverfur 2CV af götum Parísar?

Birt þann af
Svara

Ýmis flaggskip franskrar bílasögu munu hverfa af götum Parísar ef tillögur borgarstjórans Bertrand Delanoe ná fram að ganga. Þar er gert ráð fyrir banni við akstri bifreiða eldri en árgerð 1997, en mengunarvarnir í þessum bílum standast ekki kröfur nútímans. Slíkt bann myndi hins vegar verða mikið áfall fyrir bílaáhugamenn og efnaminna fólk sem ekki hefur ráð á nýlegum ökutækjum. Tillögurnar taka ekki gildi fyrr en þær hafa verið samþykktar af yfirvöldum á landsvísu. Verði sú raunin munu bílar á borð við Citroen DS og Citroen 2CV ekki framar aka um götur Parísar.
(Sjá frétt PlanetArk í gær).

Al Gore skorar á Barack Obama að láta til sín taka í loftslagsmálum

Birt þann af
Svara

Al Gore, fyrrum varaforseti Bandaríkjanna, hefur skorað á Barack Obama að nýta færið sem nú gefst í upphafi nýs kjörtímabils til að grípa til róttækra aðgerða í loftslagsmálum, svo sem með álagningu kolefnisskatta. Þannig megi í senn þoka þjóðinni fjær fjárlagaþverhnípinu svokallaða (e. fiscal cliff) sem blasir við í lok þessa árs og loftslagsþverhnípinu (e. climate cliff). Líklegt er að aðgerðir af þessu tagi njóti meiri stuðnings meðal Bandaríkjamanna nú en áður, þar sem fellibylurinn Sandy virðist hafa vakið fólk harkalega til umhugsunar um áhrif manna á loftslag á jörðinni.
(Sjá frétt The Guardian í gær).

Kók í plöntuflöskum

Birt þann af
Svara

Drykkjarvörurisinn Coca Cola hefur sett sér það markmið að árið 2020 verði allar plastflöskur fyrirtækisins búnar til úr plöntuafurðum í stað olíu. Meira en 10 milljarðar slíkra flaskna hafa þegar verið seldar frá því að framleiðsla þeirra hófst 2009, og þar með hafa sparast rúmlega 200.000 tunnur af olíu. Í ársbyrjun 2015 ætti framleiðsla á plöntuflöskum að geta margfaldast þegar tekin verður í notkun ný verksmiðja í Brasilíu, sem fyrirtækið JBF Industries byggir í samstarfi við Coca Cola. Verksmiðjan, sem verður sú stærsta sinnar tegundar í heiminum, á að geta framleitt 500.000 tonn af lífglýkól á ári úr sykurreyr og úrgangi frá sykurvinnslu, en lífglýkól er notað sem hráefni í framleiðslu á plöntuflöskum.
(Sjá frétt EDIE 9. nóvember).

Manchester United efst í umhverfisdeildinni

Birt þann af
Svara

Samtökin Carbon Trust hafa sent bréf til allra knattspyrnuliða í ensku úrvalsdeildinni, í 1.-3. deild og í skosku úrvalsdeildinni, þar sem þau eru hvött til að fylgja fordæmi Manchester United, Bolton Wanderers, Newcastle United og Bradford City, sem þegar hafa uppfyllt skilyrði Carbon Trust staðalsins um aðgerðir gegn loftslagsbreytingum. Man. U. er komið lengst þessara liða í umhverfisstarfinu, en samtals hafa liðin fjögur náð að minnka árlega losun koltvísýrings um næstum 8.000 tonn sem jafngildir orkusparnaði upp á 1,2 milljónir sterlingspunda (um 250 millj. ísl. kr). Knattspyrnufélög eru ekki í hópi mestu mengunarvalda, en þau geta hins vegar haft umtalsverð áhrif á aðra með fordæmi sínu.
(Sjá frétt EDIE 9. nóvember).

Vörubrettaviðgerðir borga sig

Birt þann af
Svara

Með frumlegri en einfaldri aðgerð hefur breska safaframleiðandanum Gerber tekist að minnka árlega koltvísýringslosun frá starfseminni um 763 tonn, spara 200.000 lítra af dísilolíu og 530.000 km akstur flutningabíla á breskum vegum. Aðgerðin fólst í því að setja upp flokkunar- og viðgerðarstöð fyrir vörubretti við verksmiðjur fyrirtækisins í Somerset. Með þessu urðu líka til 10 ný störf á svæðinu, auk þess sem Gerber getur nú séð minni aðilum í nágrenninu fyrir brettum og þannig stuðlað að enn meiri sparnaði. Verkefnið hefur verið tilnefnt til viðskiptaverðlauna Somerset 2012.
(Sjá frétt EDIE í gær).

Dönsk fyrirtæki fá aðstoð á grænu brautinni

Birt þann af
Svara

Sett hefur verið upp nýtt vefsvæði, www.Green21.dk, sem ætlað er að aðstoða dönsk fyrirtæki við að styrkja samkeppnisfærni sína á grænum markaði. Á vefsvæðinu er m.a. að finna ráðleggingar um vistvæna hönnun og hvað þurfi til að fá umhverfismerki á framleiðsluna. Vefsvæðið er samstarfsverkefni Umhverfisráðuneytis Danmerkur, Álaborgarháskóla, Dansk Industri og Umhverfis- og þróunarsamtakanna Green Cross Denmark.
(Sjá frétt á heimasíðu danska umhverfisráðuneytisins 7. nóvember).

Möstur talin ógna fegurð Vatnahéraðs

Birt þann af
Svara

Náttúruverndarsinnar í Bretlandi hafa miklar áhyggjur af áformum þarlendra stjórnvalda um að aflétta banni við uppsetningu farsímamastra og loftlína í Vatnahéraði (e. Lake District), einu helsta náttúrverndarsvæði Bretlands. Frumvarp um þessa tilslökun verður væntanlega rætt í breska þinginu á næstu vikum, en tilgangurinn er að auka hagvöxt og flýta fyrir 4G- og breiðbandsvæðingu landsbyggðarinnar. Þetta telja náttúruverndarsinnar vel hægt að gera án þess að breyta ásýnd Vatnahéraðs, enda hafi héraðið mikla þýðingu fyrir þjóðina, bæði í vistfræðilegu, hagrænu og menningarlegu tilliti.
(Sjá frétt The Guardian 3. nóvember).

Sjálflýsandi vegir og rafhleðslureinar

Birt þann af
Svara

Fyrstu sjálflýsandi akbrautirnar í Evrópu gætu orðið að veruleika á næsta ári að mati hollenskra hönnuða. Þessum áhrifum er hægt að ná fram með efni sem drekkur í sig dagsbirtuna og lýsir síðan í myrkri. Með þessu móti má spara verulega orku til lýsingar. Sömuleiðis er hægt að nota málningu sem bregst við hitabreytingum og getur þannig gefið ökumönnum skilaboð um ísingu o.fl. Innan 5 ára gæti líka opnast möguleiki á að byggja sérstakar akreinar sem sjá rafbílum fyrir hleðslu á meðan þeim er ekið eftir reinunum.
(Sjá frétt EDIE 2. nóvember).

Hertar reglur í ESB um merkingu hárlita

Birt þann af
Svara

Þann 1. nóvember sl. gengu í gildi reglur innan Evrópusambandsins um að hárlitir sem innihalda mjög ofnæmisvaldandi efni skuli merktir með sérstökum varúðarmerkingum, þ.á.m. um að tilteknir litir séu ekki ætlaðir börnum yngri en 16 ára. Eftir því sem fólk er yngra þegar það byrjar að nota hárliti er meiri hætta á að það þrói með sér ofnæmi gegn litarefnunum. Umræddar reglur gilda aðeins um sterkustu ofnæmisvaldana, þannig að áfram verða mildari hárlitir seldir án sérstakra varúðarmerkinga, jafnvel þótt þeir innihaldi ofnæmisvaldandi efni. Umræddar reglur taka væntanlega ekki gildi á Íslandi fyrst um sinn.
(Sjá frétt á Forbrugerkemi.dk 1. nóvember).