Greinasafn eftir: stefangisla

Óþekkt's avatar

Um stefangisla

Umhverfisstjórnunarfræðingur, atvinnurekandi, fjölskyldufaðir og maraþonhlaupari í Borgarnesi

Morgan Stanley fjárfestir í sjálfbærni

Birt þann af
2

MorganStanley GFjárfestingabankinn Morgan Stanley opnaði á dögunum sérstaka stofnun um sjálfbærar fjárfestingar (Morgan Stanley Institute for Sustainable Investing), sem ætlað er að beina fjármagni viðskiptavina í verkefni sem stuðla að sjálfbærri þróun. Við þetta tækifæri komst Audrey Choi, forstjóri nýju stofnunarinnar, svo að orði að vandamálin sem við þurfum að leysa í sameiningu stækki ótrúlega hratt og að eina leiðin til að ná árangri sé að veita fjármagni í stórum stíl í lausnirnar. Hin nýja stofnun hyggst beina a.m.k. 10 milljörðum dollara (um 1.200 milljörðum ísl. kr.) í sjálfbærar fjárfestingar á næstu 5 árum og bjóða upp á sérstaka sjálfbærnimenntun fyrir fjárfesta, svo eitthvað sé nefnt.
(Sjá frétt Guardian 7. nóvember).

BPA skaðlegt í lágum styrk

Birt þann af
Svara

BPAHormónaraskandi áhrif bisfenóls-A (BPA) geta komið fram við mun lægri styrk en áður var talið. Í ljósi nýrrar þekkingar á virkni hormóna og hormónaraskandi efna hefur hópur vísindamanna rýnt nánar í niðurstöður eldri rannsókna á áhrifum lítilla skammta af BPA á frumur líkamans. Í þessari yfirferð kom í ljós að efnið getur haft skaðleg áhrif, jafnvel þótt styrkur þess sé allt niður í 1/40 af því sem áður var miðað við, eða með öðrum orðum nálægt því sem algengt er að fólk verði fyrir í daglegu lífi. Áhrifin geta m.a. komið fram í blöðrum á eggjastokkum, breyttum ofnæmisviðbrögðum, hegðunarvandkvæðum og skertri frjósemi.
(Sjá frétt ScienceDaily í dag).

Nissan Leaf söluhæsti bíllinn í Noregi í október

Birt þann af
Svara

Nissan Leaf NORafbíllinn Nissan Leaf var söluhæsti fólksbíllinn í Noregi í október. Þá seldust 716 slíkir bílar, eða sem nemur 5,6% af allri bílasölu í landinu. Þetta var annar mánuðurinn í röð þar sem rafbíll er efstur á sölulistanum, en í september var sportbíllinn Tesla S á toppnum með 616 selda bíla. Markaðshlutdeild Nissan Leaf er 3,2% það sem af er árinu og hafa aðeins þrjár bílategundir selst betur. Norðmenn virðast vera í broddi fylkingar í rafbílavæðingunni, en það er m.a. rakið til ríkulegra niðurgreiðslna, niðurfellingar bílastæðagjalda, ókeypis aðgangs að hleðslustöðvum, undanþágu frá vegatollum og aðgangs að strætisvagnaakreinum.
(Sjá frétt Reuters 1. nóvember).

Kolefniskvótinn uppurinn 2034 með sama áframhaldi

Birt þann af
Svara

CO2 EDIEStærstu hagkerfi heimsins þurfa að draga úr kolefniskræfni sinni (koltvísýringslosun á hverja framleiðslueiningu (e. carbon intensity)) um 6% á ári ef takast á að viðhalda hagvexti án þess að meðalhitastig í heiminum hækki um meira en 2°C á þessari öld, ef marka má nýja skýrslu frá Pricewaterhouse Coopers. Í skýrslunni kemur einnig fram að á síðustu fimm árum hafi kolefniskræfnin aðeins minnkað um 0,7% á ári, og að jafnvel þótt þessi tala væri tvöfölduð muni hitastig hækka um 4°C fyrir aldamót, þ.e. í líkingu við svörtustu spá IPCC (Milliríkjanefndar Sameinuðu þjóðanna um loftslagsbreytingar). Ef svo heldur sem horfir verði kolefniskvóti jarðarbúa uppurinn árið 2034, sem þýðir að þá yrði að hætta losun alfarið til að komast hjá hlýnun umfram 2°C.
(Sjá frétt EDIE 4. nóvember).

Strendur Síberíu hopa

Birt þann af
Svara

MuostakhMikið sjávarrof hefur orðið á allra síðustu árum við strendur Síberíu samfara hækkun hitastigs. Vegna sífrera á strandsvæðum hafa þau staðið af sér ágang sjávar um aldir, en örlítil hækkun lofthita leiðir til nægjanlegrar þiðnunar sífrerans til að sjórinn nái yfirhöndinni. Vísindamenn frá Alfred Wegener stofnuninni hafa reiknað út að einnar gráðu hækkun meðalhitastigs yfir sumarmánuðina leiði til aukins sjávarrofs sem nemur 1,2 m á ári. Verst er ástandið á eyjunni Muostakh austur af óshólmum Lenu. Um 24% af flatarmáli eyjunnar hafa þegar tapast, og líkur eru á að hún molni niður og hverfi með öllu á næstu 100 árum.
(Sjá frétt ScienceDaily 29. október).

18.000 tonn af mat í ruslið á einum degi

Birt þann af
Svara

Grasker EDIETalið er að 18.000 tonn af graskerjum lendi í ruslatunnum Breta eftir hrekkjavökuna. Þessi mikla sóun á sér stað á sama tíma og mikil vinna er lögð í ýmis verkefni til að draga úr sóun matvæla. Nóg er til af uppskriftum þar sem grasker koma við sögu, en svo virðist sem fólk hafi ekki áhuga á að nýta sér þær. Mikið af landi og öðrum auðlindum er því lagt undir ræktun á plöntum sem fara næstum því beint í ruslið.
(Sjá frétt EDIE í dag).

Samið um 10 MW OTEC-orkuver

Birt þann af
Svara

OTECÍ gær gekk hergagnaframleiðandann Lockheed Martin frá samningi um byggingu 10 MW orkuvers undan ströndum Kína, þar sem rafmagn verður framleitt með svonefndri hafsvarmaskiptatækni (e. Ocean Thermal Energy Conversion (OTEC)). Undirbúningur að þessu hefur staðið frá því í apríl, en orkuverið verður það stærsta sinnar tegundar í heiminum og hið fyrsta sem nýtir OTEC-tæknina á viðskiptalegum forsendum. Vonir standa til að innan 5 ára verði hægt að hefjast handa við byggingu mun hagkvæmara 100 MW OTEC-orkuvers á grunni reynslunnar sem fæst í þessu verkefni. OTEC-tæknin byggir á því að nýta hitamun djúpsjávar og uppsjávar með ammoníak sem vinnslumiðil sem jafnframt er látinn drífa gufuhverflarafal. Hafsvæði u.þ.b. 80 landa nálægt miðbaug hafa hitastig sem gerir þetta mögulegt.
(Sjá frétt PlanetArk í dag).

Ólögleg urðun við Sochi

Birt þann af
1

Sochi urðunSvo virðist sem Rússar standi ekki við fyrirheit um að vetrarólympíuleikarnir í Sochi verði þeir grænustu í sögunni. Þar átti eingöngu að nota endurnýjanlegt efni og engum úrgangi átti að farga, hvorki byggingarúrgangi né öðru. AP-fréttastofan komst hins vegar að því á dögunum að mikið magn af blönduðum úrgangi hefur verið flutt á urðunarstað sem rússnesku járnbrautirnar reka við þorpið Akhshtyr, án starfsleyfis. Reyndar fylgir sögunni að starfsleyfi myndi ekki fást þótt sótt væri um það, þar sem urðunarstaðurinn sé á vatnsverndarsvæði. Haft er eftir talsmanni Greenpeace að þarna snúist „úrgangsforvarnir“ um að koma úrgangi úr augsýn.
(Sjá frétt NewsDaily í gær).

Hvernig forðast má PFOA

Birt þann af
Svara

PFOADönsku neytendasamtökin (Forbrugerrådet) birtu á dögunum 9 góð ráð fyrir neytendur sem vilja forðast PFOA (perflúoroktansýru) og önnur skyld flúorsambönd sem víða finnast í neytendavörum og eru skaðleg umhverfi og heilsu. Þessi efni hrinda frá sér vatni, fitu og óhreinindum og eru því talsvert notuð í ýmiss konar yfirborðsmeðhöndlun, m.a. við framleiðslu á eldhúsáhöldum, útvistarfatnaði og húsgögnum. Meðal þess sem Forbrugerrådet ráðleggur er að fólk geri hreint vikulega, þvoi sér oft um hendur, borði heimsendar pizzur af diskum en ekki beint úr kassanum, þvoi klæðnað áður en hann er tekinn í notkun, forðist einnota ílát, kynni sér kröfur Svansins og spyrji í verslunum hvort varan sé húðuð með flúorsamböndum.
(Sjá 9 góð ráð á heimasíðu dönsku neytendasamtakanna 24. október)

Framleiðsla hafin í stærsta vindorkuveri Afríku

Birt þann af
Svara

AshegodaSíðastliðinn laugardag hófst raforkuframleiðsla í Ashegoda vindorkuverinu í Eþíópíu, en í þessu stærsta vindorkuveri Afríku eru 84 vindmyllur með samtals 120 MW uppsett afl. Framkvæmdir á svæðinu hófust árið 2009 og var heildarkostnaður við þær um 210 milljónir evra (tæpir 35 milljarðar ísl. kr.). Raforkuframleiðsla í Eþíópíu byggist að langmestu leyti á vatnsafli en stjórnvöld vilja auka fjölbreytnina, m.a. til þess að vera minna háð úrkomu. Auk vindorku eru uppi stór áform um nýtingu jarðvarma, m.a. í samstarfi við íslensk-ameríska fyrirtækið Reykjavík Geothermal.
(Sjá frétt PlanetArk í dag).