Greinasafn eftir: stefangisla

Óþekkt's avatar

Um stefangisla

Umhverfisstjórnunarfræðingur, atvinnurekandi, fjölskyldufaðir og maraþonhlaupari í Borgarnesi

60% sænskra sveitarfélaga safna lífrænum úrgangi frá heimilum

Birt þann af
Svara

MatavfallRúmlega 60% allra sveitarfélaga í Svíþjóð (179 sveitarfélög) hafa hafið söfnun á lífrænum eldhúsúrgangi (matarleifum) frá heimilum. Í 65 sveitarfélögum ber heimilum skylda til að flokka þennan úrgang, 107 sveitarfélög bjóða íbúum þetta sem valkost og í 7 sveitarfélögum nær söfnunin aðeins til stóreldhúsa, svo sem veitingahúsa og mötuneyta. Rúmlega 25% sveitarfélaga (75 sveitarfélög) hyggjast hefja söfnun matarleifa á næstunni.
(Sjá frétt á heimasíðu Avfall Sverige 19. nóvember).

Úrgangs-, vatns- og kolefnishlutlaus verslun

Birt þann af
Svara

SainsburysBreska verslunarkeðjan Sainsbury’s opnaði á dögunum nýja verslun í Leicester, sem er sérstök að því leyti að engum úrgangi þaðan er fargað, auk þess sem reksturinn er kolefnishlutlaus og ekkert vatn er notað umfram það sem þegar var til staðar í vatnsveitu svæðisins. Meðal þess sem gert er til að ná þessum árangri má nefna, að í staðinn fyrir gas sem verslunin kaupir úr dreifikerfi svæðisins er sama magni af lífgasi bætt inn í kerfið frá metangasveri keðjunnar, auk þess sem um 70% af venjulegri vatnsþörf er mætt með regnvatni og vatnssparandi aðgerðum en þeim 30% sem á vantar með því að kosta sparnaðaraðgerðir hjá öðrum notendum vatnsveitunnar. Allir matarafgangar sem hæfir eru til manneldis eru gefnir hjálparsamtökum en annað nýtt í fóðurframleiðslu eða í einstaka tilvikum í gasgerð.
(Sjá frétt EDIE í dag).

Réttlætismerki í 25 ár

Birt þann af
Svara

Fairtrade 25 áraRéttlætismerkingar (siðgæðisvottanir (e. Fairtrade)) eiga 25 ára afmæli um þessar mundir. Fyrsta merkið af þessu tagi var hollenska Max Havelaar merkið, og fyrsta vottaða varan var kaffi frá Mexíkó sem selt var í hollenskum stórmörkuðum haustið 1988. Þetta frumkvæði Hollendinga er orðið að alþjóðlegri hreyfingu og nú eru „Fairtrade-vörur“ seldar fyrir um 4,8 milljarða evra (um 790 milljarða ísl. kr.) á ári. Vottaðar vörur eru um 30.000 talsins, og er áætlað að um 1,35 milljónir bænda og landbúnaðarverkamanna njóti góðs af þessum viðskiptum.
(Sjá frétt á heimasíðu Fairtrade International (FLO) 13. nóvember).

Olíuslys á Norðurheimskautssvæðinu fyrirséð

Birt þann af
Svara

Borpallur við GrænlandFullvíst má telja að olíuslys verði á Norðurheimskautssvæðinu ef leyft verður að bora þar eftir olíu. Þetta er mat sérfræðings sem stýrði rannsókn á Deepwater Horizon slysinu við oíuborpall BP á Mexíkóflóa vorið 2010. Slys á Norðurheimskautssvæðinu myndi auk heldur hafa langtum víðtækari afleiðingar en slys sunnar á hnettinum, þar sem niðurbrot olíunnar mun taka nokkra áratugi í svo köldum sjó, auk þess sem erfitt mun verða að beita tiltækum hreinsibúnaði við þær veðuraðstæður sem algengar eru á þessum slóðum. Olíuleit á svæðinu getur jafnvel skapað mikla hættu og haft áhrif á alla fæðukeðjuna.
(Sjá frétt The Guardian í dag).

Hænsni endurvinna lífrænan úrgang á Samsø

Birt þann af
Svara

hønselaugHópur íbúa á Samsø í Danmörku hefur tekið sig saman um stofnun hænsnafélaga sem ætlað er að nýta grænmetisúrgang frá heimilum á eynni, en þessi úrgangur hefur hingað til að mestu endað í sorpbrennslustöðvum. Gert er ráð fyrir að a.m.k. 10 heimili standi að hverju hænsnafélagi, en einstakar fjölskyldur geta þó komið sér upp eigin hænsnabúum innan ramma verkefnisins, svo fremi sem fylgt er settum reglum um nýtingu grænmetisúrgangs. Markmiðið með verkefninu er ekki aðeins að sýna fram á að þetta sé mögulegt, heldur einnig að efla samstöðu íbúanna, stuðla að breyttu hegðunarmynstri, skapa atvinnutækifæri og framleiða egg, kjúklinga og áburð fyrir eyjarskeggja. Ætlunin er að verkefnið nái til 60% af öllum heimilum á Samsø.
(Sjá frétt á heimasíðu Náttúruverndarsamtaka Danmerkur (DN) 14. nóvember).

Umhverfisvænsta bygging heims formlega opnuð í gær

Birt þann af
Svara

Co-ophúsið í ManchesterNýtt 14 hæða hús sem hýsir höfuðstöðvar Co-op í Manchester hefur verið útnefnt umhverfisvænsta hús í heimi, en það náði hæsta skori vottunarkerfisins BREEAM til þessa, 95,16%. Þessi einstaki árangur byggir á mörgum þáttum. Þar má nefna að orka fyrir húsið er framleidd úr uppskeru af ökrum Co-op, hitastig jarðvegsins undir húsinu er nýtt til að jafna árstíðabundna hitasveiflu innandyra, og tvöfalt ytrabyrði hússins virkar sem sæng á vetrum en loftræsting á sumrum. Elísabet Englandsdrottning opnaði húsið formlega í gær, fimmtudaginn 14. nóvember.
(Sjá frétt EDIE í gær).

Opnað fyrir útflutning lífrænnar framleiðslu til Kína

Birt þann af
Svara

Lífræn svínDanskir framleiðendur lífrænt vottaðra afurða binda miklar vonir við samkomulag sem matvælaráðherra Danmerkur skrifaði undir í Kína fyrr í vikunni. Í framhaldinu er þess vænst að Kínverjar samþykki lífræna vottun frá Danmörku sem aðgöngumiða að kínverskum markaði. Þetta getur haft gríðarlega þýðingu fyrir Dani, enda fer eftirspurn eftir lífrænt vottuðum vörum mjög vaxandi hjá kínversku millistéttarfólki.
(Sjá frétt á heimasíðu Økologisk Landsforening 13. nóvember).

Grænn jólasveinn væntanlegur

Birt þann af
Svara

Grænn jóliÞær fréttir berast nú utan úr hinum stóra heimi að ameríski jólasveinninn hyggist hætta að klæðast rauða búningnum sem ónefnt drykkjarvörufyrirtæki útvegaði honum á 3. áratug síðustu aldar. Að sögn jólasveinsins hefur honum þótt gaman að kynna umrædda drykki en nú finnst honum kominn tími á breytingar, enda hafi ánægjan í starfinu minnkað, öfugt við mittismálið. Fyrir jólin sem nú nálgast mun jólasveinninn því klæðast grænum búningi, auk þess sem búist er við verulegum áherslubreytingum í gjafavali. Lögð verður áhersla á góðar gjafir í anda grænni jóla, í stað gjafa sem fara fljótlega í ruslið og enda í einhverri holu í jörðinni.
(Sjá frétt ENN 12. nóvember).

Vaxandi notkun hættulegra efna í byggingariðnaði

Birt þann af
Svara

ByggebransjenUmhverfisstofnun Noregs (Miljødirektoratet) hefur áhyggjur af vaxandi notkun hættulegra efna í byggingariðnaði þar í landi. Á síðustu tveimur árum hefur notkun slíkra efna aukist, án þess að hægt sé að skýra það með vaxandi umsvifum í greininni. Um er að ræða ýmis efni sem leynast í einangrun, lími, fúgusementi og málningu, svo dæmi séu tekin.
(Sjá frétt á heimasíðu stofnunarinnar 7. nóvember).

Örbylgjum breytt í rafmagn

Birt þann af
Svara

ÖrbylgjufangariVísindamenn við Duke-háskóla hafa þróað búnað sem breytir örbylgjum í rafmagn sem nægir t.d. til að hlaða farsíma og önnur smærri raftæki. Búnaðurinn byggir á sömu grunnhugmynd og sólfangarar (e. solar cells), en í stað þess að nýta sólarljósið safnar hann orku úr rafsegulbylgjum í umhverfinu, svo sem frá gervihnöttum, örbylgjumöstrum og þráðlausum netkerfum. Með þessari tækni mætti m.a. húða loftplötur í herbergjum þannig að þær fangi bylgjur sem annars færu til spillis, sjá mælitækjum á afskekktum stöðum fyrir rafmagni eða hlaða farsíma með bylgjum frá nærliggjandi farsímamöstrum.
(Sjá frétt Science Daily 7. nóvember).