Greinasafn fyrir flokkinn: Orka

Stærsta sjávarfallalón í heimi í undirbúningi við Swansea

Birt þann af
Svara

Swansea-garðurOrkufyrirtækið Tidal Lagoon Power vill hrinda í framkvæmd áætlun um byggingu nokkurra sjávarfallavirkjana við strendur Bretlands, með samanlagt uppsett afl upp á 7.300 megavött (MW). Orkan frá virkjununum á að duga til að uppfylla 10% af allri raforkuþörf Bretlands. Heildarkostnaður við verkið er áætlaður um 12 milljarðar sterlingspunda (um 2.270 milljarðar ísl. kr). Fyrsta skrefið í þessu myndi vera bygging 9,5 km varnargarðs utan um 11,5 ferkílómetra lón í grennd við Swansea og virkjun sjávarfalla inn og út úr lóninu. Þetta yrði stærsta manngerða sjávarfallalón í heimi. Gert er ráð fyrir að þessi eina virkjun verði 320 MW, framleiði um 420 gígavattstundir (GWst) á ári og endist í 120 ár.
(Sjá frétt Guardian í gær).

Nýr flæðisrafgeymir vekur vonir

Birt þann af
1

HarvardVísindamenn við Harvardháskóla hafa þróað nýja gerð rafgeymis þar sem algengt og ódýrt lífrænt efni er notað í stað sjaldgæfra málma. Um er að ræða flæðisrafgeymi þar sem vökvi tekur í sig rafhleðslu í sérstökum rafbreyti (e. electrochemical conversion hardware) og er síðan geymdur hlaðinn í tanki. Þegar nota þarf orkuna flæðir vökvinn til baka í gegnum rafbreytinn yfir í annan tank þar sem hann bíður eftir nýrri hleðslu. Stærð tankanna er óháð stærð rafbreytisins, ólíkt því sem gerist í venjulegum rafhlöðum þar sem báðir hlutar eru sambyggðir. Lífræna efnið sem tekur við hleðslunni er kínón, en það er að finna í olíuafurðum og í fjölmörgum plöntum, m.a. í rabarbara. Þessi nýja tækni gæti boðað nýja tíma í nýtingu endurnýjanlegrar orku, svo sem vindorku og sólarorku, þar sem erfiðleikar við geymslu orkunnar hafa staðið í vegi fyrir því að hægt væri að jafna sveiflur í framboði og eftirspurn. Fræðilega væri hægt að nota tæknina hvort sem er í stórum stíl sem hluta af raforkukerfi á landsvísu eða í heimilisstærð.
(Sjá frétt á heimasíðu Harvardháskóla 8. janúar).

Sturta sem endurvinnur vatnið jafnóðum

Birt þann af
Svara

EndurvinnslusturtaSænski hönnuðurinn Mehrdad Mahdjoubi hefur kynnt nýja gerð af sturtu sem hreinsar baðvatnið jafnóðum og það kemur í niðurfallið og sendir það aftur upp í sturtuhausinn. Með þessu móti á að vera hægt að komast af með 5 lítra af vatni í 10 mínútna sturtu í stað 150 lítra eins og algengt mun vera. Þessu fylgir ekki aðeins mikill vatnssparnaður, heldur einnig orkusparnaður, þar sem vatnið kólnar lítið í ferlinu. Endurvinnslusturta Mehrdads byggir á svipaðri tækni og notuð er í geimferðum, en eftir er að sjá hvort takast megi að gera hana fýsilega til notkunar á venjulegum heimilum.
(Sjá frétt EDIE 6. janúar).

Tengiltvinnbíll með sólfangara

Birt þann af
Svara

Ford solar 200Á bílasýningunni CES2014, sem hefst í Las Vegas í dag, mun bílaframleiðandinn Ford sýna fyrsta tengiltvinnbílinn sem nýtir sólfangara á þaki til að hlaða rafhlöðurnar. Vonir standa til að sólarorkan dugi fyrir allt að 75% af daglegum bílferðum meðalökumanns.
(Sjá frétt Teknisk Ukeblad 4. janúar).

Úrgangs-, vatns- og kolefnishlutlaus verslun

Birt þann af
Svara

SainsburysBreska verslunarkeðjan Sainsbury’s opnaði á dögunum nýja verslun í Leicester, sem er sérstök að því leyti að engum úrgangi þaðan er fargað, auk þess sem reksturinn er kolefnishlutlaus og ekkert vatn er notað umfram það sem þegar var til staðar í vatnsveitu svæðisins. Meðal þess sem gert er til að ná þessum árangri má nefna, að í staðinn fyrir gas sem verslunin kaupir úr dreifikerfi svæðisins er sama magni af lífgasi bætt inn í kerfið frá metangasveri keðjunnar, auk þess sem um 70% af venjulegri vatnsþörf er mætt með regnvatni og vatnssparandi aðgerðum en þeim 30% sem á vantar með því að kosta sparnaðaraðgerðir hjá öðrum notendum vatnsveitunnar. Allir matarafgangar sem hæfir eru til manneldis eru gefnir hjálparsamtökum en annað nýtt í fóðurframleiðslu eða í einstaka tilvikum í gasgerð.
(Sjá frétt EDIE í dag).

Umhverfisvænsta bygging heims formlega opnuð í gær

Birt þann af
Svara

Co-ophúsið í ManchesterNýtt 14 hæða hús sem hýsir höfuðstöðvar Co-op í Manchester hefur verið útnefnt umhverfisvænsta hús í heimi, en það náði hæsta skori vottunarkerfisins BREEAM til þessa, 95,16%. Þessi einstaki árangur byggir á mörgum þáttum. Þar má nefna að orka fyrir húsið er framleidd úr uppskeru af ökrum Co-op, hitastig jarðvegsins undir húsinu er nýtt til að jafna árstíðabundna hitasveiflu innandyra, og tvöfalt ytrabyrði hússins virkar sem sæng á vetrum en loftræsting á sumrum. Elísabet Englandsdrottning opnaði húsið formlega í gær, fimmtudaginn 14. nóvember.
(Sjá frétt EDIE í gær).

Örbylgjum breytt í rafmagn

Birt þann af
Svara

ÖrbylgjufangariVísindamenn við Duke-háskóla hafa þróað búnað sem breytir örbylgjum í rafmagn sem nægir t.d. til að hlaða farsíma og önnur smærri raftæki. Búnaðurinn byggir á sömu grunnhugmynd og sólfangarar (e. solar cells), en í stað þess að nýta sólarljósið safnar hann orku úr rafsegulbylgjum í umhverfinu, svo sem frá gervihnöttum, örbylgjumöstrum og þráðlausum netkerfum. Með þessari tækni mætti m.a. húða loftplötur í herbergjum þannig að þær fangi bylgjur sem annars færu til spillis, sjá mælitækjum á afskekktum stöðum fyrir rafmagni eða hlaða farsíma með bylgjum frá nærliggjandi farsímamöstrum.
(Sjá frétt Science Daily 7. nóvember).

Samið um 10 MW OTEC-orkuver

Birt þann af
Svara

OTECÍ gær gekk hergagnaframleiðandann Lockheed Martin frá samningi um byggingu 10 MW orkuvers undan ströndum Kína, þar sem rafmagn verður framleitt með svonefndri hafsvarmaskiptatækni (e. Ocean Thermal Energy Conversion (OTEC)). Undirbúningur að þessu hefur staðið frá því í apríl, en orkuverið verður það stærsta sinnar tegundar í heiminum og hið fyrsta sem nýtir OTEC-tæknina á viðskiptalegum forsendum. Vonir standa til að innan 5 ára verði hægt að hefjast handa við byggingu mun hagkvæmara 100 MW OTEC-orkuvers á grunni reynslunnar sem fæst í þessu verkefni. OTEC-tæknin byggir á því að nýta hitamun djúpsjávar og uppsjávar með ammoníak sem vinnslumiðil sem jafnframt er látinn drífa gufuhverflarafal. Hafsvæði u.þ.b. 80 landa nálægt miðbaug hafa hitastig sem gerir þetta mögulegt.
(Sjá frétt PlanetArk í dag).

Framleiðsla hafin í stærsta vindorkuveri Afríku

Birt þann af
Svara

AshegodaSíðastliðinn laugardag hófst raforkuframleiðsla í Ashegoda vindorkuverinu í Eþíópíu, en í þessu stærsta vindorkuveri Afríku eru 84 vindmyllur með samtals 120 MW uppsett afl. Framkvæmdir á svæðinu hófust árið 2009 og var heildarkostnaður við þær um 210 milljónir evra (tæpir 35 milljarðar ísl. kr.). Raforkuframleiðsla í Eþíópíu byggist að langmestu leyti á vatnsafli en stjórnvöld vilja auka fjölbreytnina, m.a. til þess að vera minna háð úrkomu. Auk vindorku eru uppi stór áform um nýtingu jarðvarma, m.a. í samstarfi við íslensk-ameríska fyrirtækið Reykjavík Geothermal.
(Sjá frétt PlanetArk í dag).

Mikið af olíu á ströndum Louisiana þremur árum eftir slysið á Mexíkóflóa

Birt þann af
Svara

Mexico gulf oil spillTæp 1.400 tonn af olíumenguðu efni voru fjarlægð af strandsvæðum Louisianafylkis í Bandaríkjunum á tímabilinu mars-ágúst á þessu ári, en það er 25 sinnum meira en á sama tímabili í fyrra. Skýringin á þessu er talin vera sú að fellibylurinn Ísak og fleiri óveður hafi skolað sandi ofan af olíuhaugum sem grafist höfðu niður í fjöruna. Enn eru rúmir 300 km af strandlengju Louisiana sagðir mengaðir af olíu eftir stærsta olíuslys sögunnar sem hófst með sprengingu í olíuborpalli BP á Mexíkóflóa 20. apríl 2010. Gert er ráð fyrir dómsúrskurði snemma á næsta ári um það hversu háa sekt BP þurfi að greiða vegna slyssins.
(Sjá frétt PlanetArk í dag).