Greinasafn eftir: stefangisla

Óþekkt's avatar

Um stefangisla

Umhverfisstjórnunarfræðingur, atvinnurekandi, fjölskyldufaðir og maraþonhlaupari í Borgarnesi

Hver á lífseigasta hlutinn?

Birt þann af
2

Umhverfisstofnun Danmerkur (Miljøstyrelsen) stendur nú fyrir samkeppni um lífseigasta hlutinn undir yfirskriftinni „Danmarks længstlevende“. Keppnin fer þannig fram að Danir senda inn myndir af hlutum sem hafa dugað þeim vel og láta gjarnan sögu hlutanna fylgja. Keppnin er hluti af átakinu „Notið meira, sóið minnu“ og er ætlað að beina athygli fólks að tilfinningalegu gildi hlutanna og þeim umhverfislega sparnaði sem fylgir því að fara vel með og láta hlutina endast í stað þess að kasta þeim fyrir róða og kaupa nýja.
(Sjá nánar í frétt á heimasíðu Miljøstyrelsen í gær).

Verslunarkeðja með eigið orkuver

Birt þann af
Svara

Breska verslunarkeðjan Waitrose áformar að taka þriðja orkuver keðjunnar í notkun á næsta ári. Þetta orkuver verður ólíkt þeim tveimur fyrri að því leyti að hráefni verður eingöngu sótt í eigin úrgang keðjunnar, svo sem vörubretti og steikingarfeiti. Einnig verður notað timbur sem til fellur við niðurrif ónýtra rúma sem vipskiptavinir skila inn til verslananna. Bómull og önnur verðmæt efni úr rúmunum eru hins vegar nýtt í nýja framleiðslu. Hið nýja orkuver er liður í að gera verslunarkeðjuna sjálfa sér nóga með orku og ná markmiði um 15% samdrátt í losun gróðurhúsalofttegunda fyrir árið 2021.
(Sjá nánar í frétt EDIE í gær).

Ofnæmisvaldar í flestum hárlitum

Birt þann af
Svara

Nær útilokað er að finna hárliti sem hvorki innihalda ofnæmisvalda né önnur skaðleg efni. Í könnun sem gerð var á vegum danska neytendablaðsins Tænk fundust sterkir eða meðalsterkir ofnæmisvaldar í 20 litum af 30 sem prófaðir voru. Hinir 10 innihéldu allir væga ofnæmisvalda eða önnur efni sem geta verið skaðleg umhverfi eða heilsu.
(Sjá nánar í frétt á forbrugerkemi.dk 10. sept. sl).

Kínverjar setja 39.000.000.000.000 kr. í orkusparnað

Birt þann af
Svara

Kínversk stjórnvöld kynntu á dögunum þá fyrirætlan sína að setja jafnvirði 372 milljarða bandaríkjadala (um 39 þús. milljarða ísl. kr.) í verkefni til að bæta orkunýtingu í landinu. Þetta er liður í áætlun Kínverja um að minnka orkunotkun á hverja framleiðslueiningu í iðnaði um 21% milli áranna 2010 og 2015 og að draga úr losun gróðurhúsalofttegunda á hverja einingu í landsframleiðslu um 40-45% milli áranna 2005 og 2020. Hvað sem þessum áformum líður jókst heildarlosun gróðurhúsalofttegunda í Kína um 9% á síðasta ári og nemur nú 29% af losun á heimsvísu.
(Sjá nánar í frétt PlanetArk 23. ágúst sl).

Fyrstu vetnisstrætóarnir í Skotlandi 2014

Birt þann af
Svara

Fyrstu vetnisstrætisvagnarnir í Skotlandi koma á götuna í Aberdeen snemma árs 2014, en þá verða gangsettir þar 10 vagnar sem eru hluti af vetnisverkefni skoskra stjórnvalda. Vetnið á vagnana verður framleitt með rafmagni frá nærliggjandi vindmyllum. Tilkoma vagnanna er talin styrkja ímynd Aberdeenborgar sem frumkvöðuls á sviði grænnar orku, en nú þegar er litið á borgina sem höfuðborg sjávarorkunýtingar í Evrópu.
(Sjá nánar í frétt EDIE 23. ágúst sl).

Óábyrg efnanotkun ógnar heilsu manna

Birt þann af
Svara

Brýnt er að grípa til aðgerða til að draga úr þeirri hættu sem heilsu manna stafar af gáleysislegri efnanotkun. Þessi hætta fer jafnvel vaxandi eftir því sem framleiðsla, notkun og förgun slíkra efna færist í auknum mæli frá Vesturlöndum til þróunarlandanna. Þannig er áætlað að árlegur kostnaður vegna eitrana af völdum varnarefna í Afríku sunnan Sahara sé orðinn hærri en sem nemur öllum framlögum Vesturlanda til úrbóta í heilbrigðismálum svæðisins að frátöldum framlögum vegna HIV. Með bættri stjórnun þessara mála mætti draga verulega úr kostnaði, bæta lífsskilyrði fólks, vernda vistkerfi, draga úr mengun og stuðla að grænni tækniþróun. Allt þetta og margt fleira kemur fram í skýrslu Umhverfisstofnunar Sameinuðu þjóðanna (UNEP), Global Chemicals Outlook, sem birt var sl. miðvikudag.
(Sjá frétt á heimasíðu UNEP 5. september sl).

Botnskröpun jafnvel enn skaðlegri en talið var

Birt þann af
Svara

Niðurstöður nýrrar spænskrar rannsóknar, sem sagt var frá á heimasíðu Nature í gær, benda til að veiðar með botnvörpu spilli landslagi og lífríki sjávarbotnsins jafnvel enn meira en áður var talið. Veiðarfærin jafni út ójöfnur á yfirborðinu, þyrli upp setlögum og færi þau til, raski eða útrými botnlífverum á svæðinu, blandi mengandi efnum saman við plöntu- og dýrasvif og þannig inn í fæðukeðjuna og stuðli að skaðlegum þörungavexti og súrefnisþurrð.
(Sjá nánar í frétt PlanetArk í dag).

Silfur getur safnast upp í lífverum

Birt þann af
Svara

Silfur, m.a. í nanóformi, er í auknum mæli notað sem bakteríuvörn í ýmsar neytendavörur, svo sem skó, sokka, skurðarbretti og þvottavélar. Nú hafa bandarískir vísindamenn hins vegar komist að því að silfur sem upphaflega var til staðar í nanóformi getur safnast upp í lífverum í hærri styrk en í umhverfi þeirra. Þetta veldur nokkrum áhyggjum, en hingað til hafa menn talið að þegar silfrið bærist út í náttúruna settist það að í jarðvegi og setlögum en hefði ekki tilhneigingu til lífmögnunar.
(Sjá nánar í frétt á forbrugerkemi.dk 3. september sl. og
útdrátt úr grein í Environmental Science and Technology).

Indverjar efla rafbílaiðnaðinn

Birt þann af
Svara

Ríkisstjórn Indlands hefur samþykkt áætlun um að verja 230 milljörðum rúpía (um 500 milljörðum ísl. kr.) á næstu 8 árum til að styðja við þarlenda framleiðslu á rafbílum og tvinnbílum. Reiknað er með að 55-60% af fénu komi frá ríkinu, en afgangurinn frá fyrirtækjum. Markmiðið er að 6 milljón ökutæki af þessu tagi verði komin á göturnar árið 2020, þar af 4-5 milljónir á tveimur hjólum.
(Sjá nánar í frétt PlanetArk 31. ágúst sl).

Flokkað á skokkinu

Birt þann af
Svara

Ríkisstjórn Skotlands stofnaði á dögunum sjóð upp á 500.000 sterlingspund (um 96 milljónir ísl. kr.) til að stuðla að bættri flokkunaraðstöðu á almannafæri í skoskum byggðum. Mikill árangur hefur þegar náðst í flokkun úrgangs á heimilum, og því telja Skotar einsýnt að það sama eigi að geta gilt um fjölfarna staði utandyra. Takist að ná flokkunarhlutfallinu upp í 70% fyrir árið 2025 er talið að það samsvari 178 milljóna sterlingspunda (um 34 milljarða ísl. kr.) innspýtingu í hagkerfið. Landeigendur, sveitarfélög og rekstraraðilar geta sótt um framlög úr hinum nýja sjóði til að koma upp aðstöðu fyrir „Recycle on the Go„, þ.e. til flokkunar á skokkinu.
(Sjá nánar í frétt EDIE 28. ágúst sl).