Greinasafn fyrir flokkinn: Grænt hagkerfi

Örbylgjum breytt í rafmagn

Birt þann af
Svara

ÖrbylgjufangariVísindamenn við Duke-háskóla hafa þróað búnað sem breytir örbylgjum í rafmagn sem nægir t.d. til að hlaða farsíma og önnur smærri raftæki. Búnaðurinn byggir á sömu grunnhugmynd og sólfangarar (e. solar cells), en í stað þess að nýta sólarljósið safnar hann orku úr rafsegulbylgjum í umhverfinu, svo sem frá gervihnöttum, örbylgjumöstrum og þráðlausum netkerfum. Með þessari tækni mætti m.a. húða loftplötur í herbergjum þannig að þær fangi bylgjur sem annars færu til spillis, sjá mælitækjum á afskekktum stöðum fyrir rafmagni eða hlaða farsíma með bylgjum frá nærliggjandi farsímamöstrum.
(Sjá frétt Science Daily 7. nóvember).

Morgan Stanley fjárfestir í sjálfbærni

Birt þann af
2

MorganStanley GFjárfestingabankinn Morgan Stanley opnaði á dögunum sérstaka stofnun um sjálfbærar fjárfestingar (Morgan Stanley Institute for Sustainable Investing), sem ætlað er að beina fjármagni viðskiptavina í verkefni sem stuðla að sjálfbærri þróun. Við þetta tækifæri komst Audrey Choi, forstjóri nýju stofnunarinnar, svo að orði að vandamálin sem við þurfum að leysa í sameiningu stækki ótrúlega hratt og að eina leiðin til að ná árangri sé að veita fjármagni í stórum stíl í lausnirnar. Hin nýja stofnun hyggst beina a.m.k. 10 milljörðum dollara (um 1.200 milljörðum ísl. kr.) í sjálfbærar fjárfestingar á næstu 5 árum og bjóða upp á sérstaka sjálfbærnimenntun fyrir fjárfesta, svo eitthvað sé nefnt.
(Sjá frétt Guardian 7. nóvember).

Nissan Leaf söluhæsti bíllinn í Noregi í október

Birt þann af
Svara

Nissan Leaf NORafbíllinn Nissan Leaf var söluhæsti fólksbíllinn í Noregi í október. Þá seldust 716 slíkir bílar, eða sem nemur 5,6% af allri bílasölu í landinu. Þetta var annar mánuðurinn í röð þar sem rafbíll er efstur á sölulistanum, en í september var sportbíllinn Tesla S á toppnum með 616 selda bíla. Markaðshlutdeild Nissan Leaf er 3,2% það sem af er árinu og hafa aðeins þrjár bílategundir selst betur. Norðmenn virðast vera í broddi fylkingar í rafbílavæðingunni, en það er m.a. rakið til ríkulegra niðurgreiðslna, niðurfellingar bílastæðagjalda, ókeypis aðgangs að hleðslustöðvum, undanþágu frá vegatollum og aðgangs að strætisvagnaakreinum.
(Sjá frétt Reuters 1. nóvember).

Samið um 10 MW OTEC-orkuver

Birt þann af
Svara

OTECÍ gær gekk hergagnaframleiðandann Lockheed Martin frá samningi um byggingu 10 MW orkuvers undan ströndum Kína, þar sem rafmagn verður framleitt með svonefndri hafsvarmaskiptatækni (e. Ocean Thermal Energy Conversion (OTEC)). Undirbúningur að þessu hefur staðið frá því í apríl, en orkuverið verður það stærsta sinnar tegundar í heiminum og hið fyrsta sem nýtir OTEC-tæknina á viðskiptalegum forsendum. Vonir standa til að innan 5 ára verði hægt að hefjast handa við byggingu mun hagkvæmara 100 MW OTEC-orkuvers á grunni reynslunnar sem fæst í þessu verkefni. OTEC-tæknin byggir á því að nýta hitamun djúpsjávar og uppsjávar með ammoníak sem vinnslumiðil sem jafnframt er látinn drífa gufuhverflarafal. Hafsvæði u.þ.b. 80 landa nálægt miðbaug hafa hitastig sem gerir þetta mögulegt.
(Sjá frétt PlanetArk í dag).

Framleiðsla hafin í stærsta vindorkuveri Afríku

Birt þann af
Svara

AshegodaSíðastliðinn laugardag hófst raforkuframleiðsla í Ashegoda vindorkuverinu í Eþíópíu, en í þessu stærsta vindorkuveri Afríku eru 84 vindmyllur með samtals 120 MW uppsett afl. Framkvæmdir á svæðinu hófust árið 2009 og var heildarkostnaður við þær um 210 milljónir evra (tæpir 35 milljarðar ísl. kr.). Raforkuframleiðsla í Eþíópíu byggist að langmestu leyti á vatnsafli en stjórnvöld vilja auka fjölbreytnina, m.a. til þess að vera minna háð úrkomu. Auk vindorku eru uppi stór áform um nýtingu jarðvarma, m.a. í samstarfi við íslensk-ameríska fyrirtækið Reykjavík Geothermal.
(Sjá frétt PlanetArk í dag).

Leigja treyju?

Birt þann af
Svara

LeasefleeceFyrirtækið Mud Jeans í Hollandi býður nú hettupeysur til leigu, gerðar úr endurunnum gallabuxum úr lífrænni bómull, auk viskósblöndu. Leigjendur geta valið um að greiða 100 evrur í upphafi leigutímans, sem getur verið eins langur og verkast vill, eða greiða 20 evrur í upphafi og síðan 5 evrur á mánuði þar til sömu hámarksupphæð er náð. Þegar flíkinni er skilað, sem getur gerst hvenær sem er, er 20 evru skilagjald endurgreitt í báðum tilvikum í formi afsláttar af næstu viðskiptum. Með þessu móti er fötunum aldrei hent, heldur er allt efnið endurunnið að notkun lokinni. Verkefnið gengur undir nafninu Lease a fleece.
(Sjá frétt EDIE í dag).

Ný tækni í vetnisframleiðslu

Birt þann af
Svara

SkolpvetnisbunadurHópur vísindamanna undir stjórn Yat Li, aðstoðarprófessors í efnafræði við Háskólann í Santa Cruz í Kaliforníu, hefur þróað búnað sem framleiðir vetni úr fráveituvatni og sólarljósi með hjálp örvera en án utanaðkomandi orku. Hugmyndin byggir á samnýtingu tvenns konar efnarafala, sem báðir geta framleitt vetni einir og sér, en þurfa til þess vægan rafstraum. Búnaður Li og félaga hefur enn sem komið er aðeins verið prófaður í tilraunastofu, en nýtingarmöguleikarnir eru miklir ef takast má að þróa búnaðinn til nota í hreinsistöðvum fyrir fráveituvatn. Með þessu fæst ekki aðeins vetni án mikillar fyrirhafnar eða rekstrarkostnaðar, heldur brotna lífræn mengunarefni í fráveituvatninu niður í leiðinni.
(Sjá frétt Science Daily 10. október).

Þjóðverjar koma í veg fyrir samkomulag um minnkandi útblástur frá bílum

Birt þann af
Svara

Peter AltmaierUmhverfisráðherrar ríkja ESB létu í gær undan þrýstingi þýskra stjórnvalda og lögðu til hliðar fyrirliggjandi samkomulag um að meðalkoltvísýringslosun bíla sem framleiddir verða í álfunni eftir 2020 skuli vera að hámarki 95 g/km (sem samsvarar um 4,1 lítra bensíneyðslu á 100 km). Rök Þjóðverja voru þau að slík takmörkun myndi koma hart niður á þýskum bílaframleiðendum. Connie Hedegaard loftslagsstjóri ESB hefur lýst vonbrigðum sínum með þessa niðurstöðu, enda hefði verið unnið að samkomulaginu í 5 ár. Lena Ek umhverfisráðherra Svíþjóðar tekur í sama streng og segir ábyrgð Þjóðverja mikla. Umhverfisverndarsinnar eru einnig mjög ósáttir og benda á að 95 gramma markmiðið hefði sparað Evrópuþjóðum eldsneyti upp á um 70 milljarða evra (um 11.500 milljarða ísl. kr.) árlega, þar af 9 milljarða (1.500 milljarða ísl. kr.) fyrir Þjóðverja sjálfa. Þetta sé óásættanlegur kostnaður sem leggist á evrópska bíleigendur og á jörðina sem hlýni hraðar en ella, auk þess sem þetta kunni að skaða samkeppnishæfni bílaiðnaðarins í Evrópu.
(Sjá frétt PlanetArk í dag).

Gríðarleg verðlækkun vetnisbíla í augsýn

Birt þann af
Svara

Toyota hydrogenFulltrúar bílaframleiðandans Toyota segjast hafa náð að lækka verð á efnarafölum fyrir vetnisbíla úr rúmlega milljón dollurum niður í 51.000 dollara (um 6,2 milljónir ísl. kr). Árið 2015 geti fyrirtækið boðið vetnisbíla á innan við 100.000 dollara (12,2 millj. ísl. kr.) og einhvern tímann á 3. áratug þessarar aldar muni Toyota selja tugþúsundir vetnisbíla á ári. Verðlækkunin byggist m.a. á því að tekist hefur að minnka magn platínu í hverjum efnarafali úr 100 g. í um 30 g. Heimsmarkaðsverð á hverju grammi er nú um 6.000 ísl. kr., þannig að platínuþörfin skiptir talsverðu máli fyrir heildarkostnaðinn. Gert er ráð fyrir enn meiri framförum á þessu sviði á næstunni vegna bættrar tækni við húðun. Einnig hefur tekist að lækka verð á vetniskútum verulega með breyttri efnisnotkun.
(Sjá frétt PlanetArk 11. október).

Alþjóðabankinn og AGS leggja áherslu á úrbætur í loftslagsmálum

Birt þann af
Svara

IMF ReuterChristine Lagarde forstjóri Alþjóðagjaldeyrissjóðsins (AGS) og Jim Young Kim forseti Alþjóðabankans (AB) gáfu út sameiginlega yfirlýsingu við upphaf ársfundar stofnananna sem nú er að hefjast í Washington, þess efnis að loftslagsmál muni hér eftir vera forgangsverkefni hjá báðum stofnunum. Christine Lagarde sagði að aðgerðir til að draga úr losun gróðurhúsalofttegunda gætu styrkt hagkerfi þjóða verulega. Í því skyni þyrfti annars vegar að vinna að réttri verðlagningu kolefnis, og þar gæti IGS hjálpað til, og hins vegar að afnema niðurgreiðslur á jarðefnaeldsneyti, en þær nema nú um 485 milljörðum dollara á ári. Kim Young Kim sagði að AB legði megináherslu á þrennt: Tryggja sjálfbæra orku í öllum löndum, styðja við kolefnislétt borgarskipulag og stuðla að kolefnisvænni þróun í landbúnaði. Samstilltar aðgerðir stofnananna tveggja gætu skipt miklu máli til að sporna gegn loftslagsbreytingum.
(Sjá frétt PlanetArk í gær).