Greinasafn fyrir flokkinn: Neytendur

Nissan selur 35000. rafbílinn vestra

Birt þann af
Svara

Nissan LeafNú hafa 35.000 rafbílar af gerðinni Nissan Leaf selst í Bandaríkjunum. Þessi áfangi náðist í síðustu viku, rétt fyrir „tengladaginn“ (e. National Plug In Day) sem haldinn var hátíðlegur vestanhafs um helgina. Söluaukningin frá fyrra ári er 317%, sem helgast væntanlega m.a. af því að farið var að framleiða bílana í Bandaríkjunum, auk þess sem verðið á þeim lækkaði. Aukin umhverfisvitund er ekki sögð helst ástæða þess að fólk vestra velur Nissan Leaf, heldur hitt hversu ódýr bíllinn er í rekstri, kraftmikill og skemmtilegur í akstri.
(Sjá frétt á HybridCars.com 27. september).

Fyrstu Svansmerktu hestavörurnar

Birt þann af
Svara

Hestar Svanen DKNú er í fyrsta sinn hægt að kaupa Svansmerktar hreinlætisvörur fyrir hesta, en fyrr í þessum mánuði fékk fyrirtækið Nathalie Horse Care í Danmörku leyfi til að merkja nokkrar af framleiðsluvörum sínum með Norræna svaninum. Svansmerkið tryggir að vörurnar séu lausar við parabena, ilmefni og önnur efni sem talin eru hormónaraskandi eða geta valdið ofnæmi. Í þessari nýju Svansmerktu vörulínu má m.a. finna hestasjampó af ýmsu tagi, þ.m.t. flösusjampó og sérstakt sjampó fyrir íslenska hesta.
(Sjá frétt á heimasíðu Svansins í Danmörku 5. september).

PFOA bannað í Noregi

Birt þann af
Svara

PFOAFrá og með 1. júní 2014 mega neytendavörur sem seldar eru í Noregi ekki innihalda efnið PFOA (perflúoroktansýru). Með þessu banni ganga norsk stjórnvöld lengra en Evrópusambandið, en rökin eru þau að efnið sé eitrað fyrir þá sem umgangast það oft, krabbameinsvaldandi og dragi úr frjósemi, auk þess sem það brotni mjög hægt niður í náttúrunni. Efnið safnast einnig fyrir í líkömum fólks og hefur m.a. fundist í blóði og móðurmjólk. PFOA getur verið til staðar í ýmsum vörum til daglegra nota. Efnið hrindir frá sér vatni og fitu og hefur m.a. verið notað í málningu, regnfatnað, skíðaáburð og steikarpönnur (teflon).
(Sjá frétt á heimasíðu norska umhverfisráðuneytisins 17. september).

Illgresiseyðir í þvagi Evrópubúa

Birt þann af
Svara

glyphosate1enLeifar af plöntueitrinu glyphosate fundust í þvagi 44% sjálfboðaliða sem tóku þátt í nýlegri rannsókn sem gerð var fyrir samtökin Friends of the Earth Europe og náði til 18 Evrópulanda. Niðurstöðurnar voru nokkuð mismunandi eftir löndum. Þannig var hlutfall einstaklinga með glyphosate í þvagi hæst á Möltu eða 90%, en lægst í Búlgaríu og Makedóníu, 10%. Ekki er vitað hvernig glyphosate barst í líkama þátttakenda, en efnið er víða notað sem illgresiseyðir í landbúnaði, á opnum svæðum og í húsagörðum, oftast undir vörumerkinu Roundup.
(Sjá frétt á heimasíðu Global Research 13. júní).

Hollráð fyrir eldhúsið

Birt þann af
Svara

kemi på menuenDanska upplýsingamiðstöðin um umhverfi og heilsu hefur tekið saman nokkur góð ráð til að hjálpa fólki að forðast varasöm efni sem kunna að leynast í eldhúsáhöldum og berast í matvæli ef ekki er farið að öllu með gát. Fyrsta og einfaldasta ráðið er að nota áhöld eingöngu til þess sem þau eru ætluð til. Þeir sem eru læsir á dönsku geta nálgast öll þessi góðu ráð á heimasíðu upplýsingamiðstöðvarinnar. Þar má finna ráð um potta, pönnur, form, matarumbúðir, mataráhöld, nestisbox og drykkjarbrúsa, svo eitthvað sé nefnt.
(Sjá frétt á forbrugerkemi.dk. 8. júní).

Samsung Galaxy S4 fyrstur með TCO-vottun

Birt þann af
Svara

TCO CertifiedSamsung Galaxy S4 varð á dögunum fyrsti snjallsíminn á markaðnum til að fá svonefnda TCO-sjálfbærnivottun, en TCO er óháð alþjóðlegt vottunarkerfi fyrir samskiptabúnað af ýmsu tagi. Til að fá þessa vottun þurfa snjallsímar að uppfylla viðmiðunarkröfur sem ná til alls lífsferils símanna og snúast m.a. um félagslega ábyrgð í framleiðslunni, ýmsa heilsu- og umhverfisþætti á notkunarskeiði, magn hættulegra efna o.fl. Það er von þeirra sem að vottuninni standa að þessi fyrsti TCO-vottaði sími hafi áhrif á það hvernig staðið verði að framleiðslu annarra snjallsíma á næstu misserum.
(Sjá fréttatilkynningu TCO Development 16. maí sl.).

Gamlir plastdiskar geta gefið frá sér melamín

Birt þann af
Svara

Melamíndót IMSMelamín og formaldehýð úr borðbúnaði úr plasti geta borist í matvæli, einkum þegar borðbúnaðurinn er tekinn að slitna eða ef hitastig matvælanna fer yfir 70°C. Því hefur Danska upplýsingamiðstöðin um umhverfi og heilsu hvatt fólk til að láta gamla plastdiska og plastglös ekki ganga til yngri barna í fjölskyldunni, en nota þess í stað áhöld sem keypt voru eftir 1. janúar 2013, þar sem þá lækkuðu hámarksgildi (sértæk flæðimörk) fyrir melamín (úr 30 í 2,5 mg/kg matvæla) í samræmi við nýjar reglur ESB. Aldrei ætti að hita mat í ílátum úr melamínplasti í örbylgjuofni. Melamín hefur efnafræðiheitið 2,4,6-tríamínó-1,3,5-tríazín og er ásamt formaldehýði uppistaðan í melamínplasti (öðru nafni amínóplasti).
(Sjá frétt á forbrugerkemi.dk 21. maí).

100% lífræn matvæli

Birt þann af
Svara

Jörðin sem við étumSænsku náttúruverndarsamtökin Naturskyddsföreningen hrintu á dögunum af stað sérstöku átaki til að stuðla að því að neytendur taki lífrænt vottaðar matvörur fram yfir annan mat. Í átakinu er lögð áhersla á að sýna skuggahliðar efnanotkunar í landbúnaði og benda á hvernig hægt sé að auka hlutdeild lífrænna matvæla í 100%. Sjónum verður sérstaklega beint að barnafjölskyldum og þeim sem kaupa lífræn matvæli endrum og sinnum og þeim áhrifum á náttúruna, eigin heilsu og velferð dýra sem þetta fólk getur haft í daglegum matarinnkaupum. Um leið og átakið var kynnt fór fram sérstök kynning á bókinni „Jörðin sem við étum“.
(Sjá fréttatilkynningu Naturskyddsföreningen 20. maí).

Vaxandi rusl á breskum fjörum

Birt þann af
Svara

Cigarette-butts-ends-left-009Rusl á breskum fjörum jókst um 12% milli áranna 2011 og 2012, mælt í fjölda hluta á hvern kílómetra strandlengjunnar. Mest varð aukningin á rusli frá reykingamönnum. Þannig fjölgaði kveikjurum og sígarettupökkum um 90% á milli ára og fjöldi sígarettufiltera tvöfaldaðist. Á einni helgi í september í fyrra fylltu sjálfboðaliðar 1.800 sorpsekki með rusli á 90 km strandlengju, og reyndust um 65% af ruslinu vera plast af einhverju tagi. Þetta veldur sérstökum áhyggjum, þar sem plastið brotnar seint eða ekki niður í náttúrunni. Svo virðist sem áratugalöng viðleitni til að bæta umgengni fólks hafi ekki skilað miklum árangri.
(Sjá frétt The Guardian í gær).

Húsgögn og gólf úr ólöglegu timbri til sölu

Birt þann af
Svara

SiberiutigurMiklar líkur eru á að húsgögn og gólfefni úr ólöglegu timbri séu seld í Evrópu þrátt fyrir reglur sem banna slík viðskipti. Í nýrri úttekt WWF kemur fram að á síðan um aldamót hafi útflutningur á timbri frá austasta hluta Rússlands verið tvöfalt til fjórfalt það magn sem leyft er að fella og vinna á þeim slóðum. Timbrið er að mestu leyti flutt til Kína þar sem framleidd eru úr því húsgögn og gólfefni, sem síðan eru m.a. flutt út til Evrópu. Skógarhöggið spillir búsvæðum Síberíutígursins, sem er í mikilli útrýmingarhættu, auk þess sem það bitnar á frumbyggjum og samfélögum þeirra. Stjórnvöld í Rússlandi hafa ekki náð að stöðva þessa starfsemi og því brýnir WWF það fyrir vestrænum fyrirtækjum og neytendum að huga betur að uppruna varnings úr timbri og kaupa helst FSC-vottaðar vörur.
(Sjá frétt á heimasíðu WWF í Svíþjóð í gær).