Greinasafn fyrir flokkinn: Loftslagsmál

Mikil hnignun votlendis í Kína

Birt þann af
Svara

Kína votlendiVotlendi í Kína hefur minnkað um 9% frá árinu 2003. Þetta hefur ýtt undir vatnsskort, sem þegar er orðinn alvarlegt vandamál fyrir íbúa og atvinnulíf. Í Kína býr rúmlega fimmtungur jarðarbúa, en þar eru aðeins um 6% af aðgengilegu ferskvatni jarðar. Votlendið sem tapast hefur á síðustu 10 árum er um 340.000 ferkílómetrar að flatarmáli, eða rúmlega þrefalt stærra en Ísland. Þessu landi hefur ýmist verið breytt í landbúnaðarland, lagt undir mannvirki eða þornað upp vegna loftslagsbreytinga.
(Sjá frétt PlanetArk í dag).

Loftslagsmál útskýrð á 9 mínútum

Birt þann af
Svara

ipcc stuttmyndNý norsk stuttmynd sem útskýrir stöðu loftslagsmála á 9 mínútum var frumsýnd á loftslagsráðstefnunni í Varsjá á dögunum. Myndin, sem Snöball film gerði fyrir Milliríkjanefnd Sameinuðu þjóðanna um loftslagsbreytingar (IPCC), hentar vel til að kynna loftslagsmál í skólum og annars staðar þar sem þörf er fyrir einfaldar og samþjappaðar útskýringar.
(Sjá frétt á heimasíðu Umhverfisstofnunar Noregs 22. nóvember).

Næststærsti kolefnismarkaður í heimi opnaður í Guangdong

Birt þann af
Svara

???????????????????????????????Í næsta mánuði verður opnaður markaður með kolefnislosunarheimildir í Guangdonghéraði í Kína, en þar búa rúmlega 100 milljón manns. Þetta verður næststærsti markaður sinnar tegundar í heiminum, næst á eftir kolefnismarkaði ESB. Markaðurinn í Guangdong miðast við að losun 202 aðildarfyrirtækja verði ekki meiri en 350 milljón tonn á yfirstandandi ári. Til að byrja með verður stærstum hluta kvótans úthlutað án endurgjalds, en tiltekinn hluti verður seldur á uppboðsmarkaði stjórnvalda. Í árslok verður síðan opnað fyrir endursölu. Stofnun kolefnismarkaða í Kína tekur mið af því fyrirheiti Kínverja að draga úr losun koltvísýrings um 45% á hverja einingu vergrar landsframleiðslu fyrir árið 2020.
(Sjá frétt PlanetArk í dag).

Kolefniskvótinn uppurinn 2034 með sama áframhaldi

Birt þann af
Svara

CO2 EDIEStærstu hagkerfi heimsins þurfa að draga úr kolefniskræfni sinni (koltvísýringslosun á hverja framleiðslueiningu (e. carbon intensity)) um 6% á ári ef takast á að viðhalda hagvexti án þess að meðalhitastig í heiminum hækki um meira en 2°C á þessari öld, ef marka má nýja skýrslu frá Pricewaterhouse Coopers. Í skýrslunni kemur einnig fram að á síðustu fimm árum hafi kolefniskræfnin aðeins minnkað um 0,7% á ári, og að jafnvel þótt þessi tala væri tvöfölduð muni hitastig hækka um 4°C fyrir aldamót, þ.e. í líkingu við svörtustu spá IPCC (Milliríkjanefndar Sameinuðu þjóðanna um loftslagsbreytingar). Ef svo heldur sem horfir verði kolefniskvóti jarðarbúa uppurinn árið 2034, sem þýðir að þá yrði að hætta losun alfarið til að komast hjá hlýnun umfram 2°C.
(Sjá frétt EDIE 4. nóvember).

Strendur Síberíu hopa

Birt þann af
Svara

MuostakhMikið sjávarrof hefur orðið á allra síðustu árum við strendur Síberíu samfara hækkun hitastigs. Vegna sífrera á strandsvæðum hafa þau staðið af sér ágang sjávar um aldir, en örlítil hækkun lofthita leiðir til nægjanlegrar þiðnunar sífrerans til að sjórinn nái yfirhöndinni. Vísindamenn frá Alfred Wegener stofnuninni hafa reiknað út að einnar gráðu hækkun meðalhitastigs yfir sumarmánuðina leiði til aukins sjávarrofs sem nemur 1,2 m á ári. Verst er ástandið á eyjunni Muostakh austur af óshólmum Lenu. Um 24% af flatarmáli eyjunnar hafa þegar tapast, og líkur eru á að hún molni niður og hverfi með öllu á næstu 100 árum.
(Sjá frétt ScienceDaily 29. október).

Loftslagsflóttamaður sækir um hæli

Birt þann af
Svara

KiribatiIoane Teitiota, 37 ára fjölskyldufaðir frá Kiribati, hefur farið þess á leit við áfrýjunardómstól í Auckland á Nýja-Sjálandi að hann snúi við fyrri ákvörðun um að synja Ioane um hæli sem loftslagsflóttamaður. Upphaflega ákvörðunin var byggð á því að lagarök skorti, þar sem lífi umsækjandans væri ekki ógnað þótt hann sneri til fyrri heimkynna. Ione heldur því fram að fjölskyldan sé ekki óhult á Kiribati, þar sem hækkað sjávarborð sé þegar farið að leiða til mengunar drykkjarvatns, uppskerubrests og eyðileggingar heimila í flóðum. Flóttamannalöggjöfin sé úrelt að því leyti að hún nái ekki til loftslagsógna. Kiribati er eyjaklasi á Suður-Kyrrahafi, og er meðalhæð lands þar aðeins um 2 m.y.s. Yfirvöld þar hafa keypt land á Fijieyjum þar sem áformað er að reisa byggðir fyrir fólk frá Kiribati. Einnig er unnið að menntunarátaki undir yfirskriftinni „þjóðflutningar með reisn“, sem ætlað er að búa íbúa sem best undir vistaskiptin.
(Sjá frétt PlanetArk 17. október).

Alþjóðabankinn og AGS leggja áherslu á úrbætur í loftslagsmálum

Birt þann af
Svara

IMF ReuterChristine Lagarde forstjóri Alþjóðagjaldeyrissjóðsins (AGS) og Jim Young Kim forseti Alþjóðabankans (AB) gáfu út sameiginlega yfirlýsingu við upphaf ársfundar stofnananna sem nú er að hefjast í Washington, þess efnis að loftslagsmál muni hér eftir vera forgangsverkefni hjá báðum stofnunum. Christine Lagarde sagði að aðgerðir til að draga úr losun gróðurhúsalofttegunda gætu styrkt hagkerfi þjóða verulega. Í því skyni þyrfti annars vegar að vinna að réttri verðlagningu kolefnis, og þar gæti IGS hjálpað til, og hins vegar að afnema niðurgreiðslur á jarðefnaeldsneyti, en þær nema nú um 485 milljörðum dollara á ári. Kim Young Kim sagði að AB legði megináherslu á þrennt: Tryggja sjálfbæra orku í öllum löndum, styðja við kolefnislétt borgarskipulag og stuðla að kolefnisvænni þróun í landbúnaði. Samstilltar aðgerðir stofnananna tveggja gætu skipt miklu máli til að sporna gegn loftslagsbreytingum.
(Sjá frétt PlanetArk í gær).

Banvæn þrenning ógnar höfunum

Birt þann af
Svara

Hvalir GL ReutersNiðurstöður alþjóðlegrar rannsóknar sem kynntar voru fyrr í dag benda til að samverkandi áhrif hlýnunar, súrnunar og minnkandi súrefnismettunar hafi mun meiri skaðleg áhrif á lífríkið í höfunum en menn hafa áður gert sér grein fyrir, og er jafnvel talað um „banvæna þrenningu“ í þessu sambandi. Hafið hlýnar smám saman vegna hlýnunar andrúmsloftsins, súrnar vegna upptöku koltvísýrings úr andrúmsloftinu og verður súrefnissnauðara vegna aukins þörungagróðurs í kjölfar útskolunar næringarefna frá landi. Ástandið í höfunum er orðið svipað því sem það var á Paleósen-Eósen mörkunum fyrir um 55 milljónum ára þegar fjöldi tegunda dó út. Breytingarnar sem nú eru að verða gerast hins vegar mun hraðar en þá.
(Sjá frétt Reuters í dag)

„Þessi umbreyting er mannanna verk“

Birt þann af
Svara

„Loftslagsbreytingar eru raunverulegar, þær er að gerast núna, þessi umbreyting er mannanna verk, og aðeins mannanna verk geta bjargað heiminum frá verstu áhrifunum. Þetta er ekki færibandaskýrsla sem við getum hent inn í skjalaskáp. Þetta er ekki pólitískt plagg búið til af pólitíkusum. Þetta eru vísindi“.
(John Kerry, utanríkisráðherra Bandaríkjanna, í tilefni af kynningu 1. hluta fimmtu ástandsskýrslu Vísindanefndar Sameinuðu þjóðanna um loftslagsbreytingar, sem fram fór í Stokkhólmi í morgun kl. 8 að íslenskum tíma. (Úr beinni útsendingu The Guardian)).

Loftslagsbreytingar gætu fært Bretum malaríu

Birt þann af
Svara

MoskítóVirtir sérfræðingar á sviði heilbrigðismála hvetja bresk stjórnvöld til að bregðast nú þegar við vaxandi ógn sem stafar af malaríu og öðrum hitabeltissjúkdómum, svo sem beinbrunasótt og Vesturnílarveirunni, sem eiga það sameiginlegt að berast með moskítóflugum. Tilfellum slíkra sjúkdóma hefur fjölgað mjög í sunnanverðri Evrópu á allra síðustu árum og telja umræddir sérfræðingar að þeir kunni að berast tiltölulega hratt norður á bóginn samfara hækkandi hitastigi og aukinni úrkomu að sumarlagi, eins og spáð er að raunin verði á Bretlandseyjum á næstu árum. Á síðasta ári kom út skýrsla þar sem því var spáð að sjúkdómar af þessu tagi gætu haldið innreið sína á Bretlandi upp úr 2080, en nú  þykir líklegt að það gerist mun fyrr.
(Sjá frétt The Guardian 5. maí).