Greinasafn fyrir flokkinn: Loftslagsmál

Manchester United efst í umhverfisdeildinni

Birt þann af
Svara

Samtökin Carbon Trust hafa sent bréf til allra knattspyrnuliða í ensku úrvalsdeildinni, í 1.-3. deild og í skosku úrvalsdeildinni, þar sem þau eru hvött til að fylgja fordæmi Manchester United, Bolton Wanderers, Newcastle United og Bradford City, sem þegar hafa uppfyllt skilyrði Carbon Trust staðalsins um aðgerðir gegn loftslagsbreytingum. Man. U. er komið lengst þessara liða í umhverfisstarfinu, en samtals hafa liðin fjögur náð að minnka árlega losun koltvísýrings um næstum 8.000 tonn sem jafngildir orkusparnaði upp á 1,2 milljónir sterlingspunda (um 250 millj. ísl. kr). Knattspyrnufélög eru ekki í hópi mestu mengunarvalda, en þau geta hins vegar haft umtalsverð áhrif á aðra með fordæmi sínu.
(Sjá frétt EDIE 9. nóvember).

Vörubrettaviðgerðir borga sig

Birt þann af
Svara

Með frumlegri en einfaldri aðgerð hefur breska safaframleiðandanum Gerber tekist að minnka árlega koltvísýringslosun frá starfseminni um 763 tonn, spara 200.000 lítra af dísilolíu og 530.000 km akstur flutningabíla á breskum vegum. Aðgerðin fólst í því að setja upp flokkunar- og viðgerðarstöð fyrir vörubretti við verksmiðjur fyrirtækisins í Somerset. Með þessu urðu líka til 10 ný störf á svæðinu, auk þess sem Gerber getur nú séð minni aðilum í nágrenninu fyrir brettum og þannig stuðlað að enn meiri sparnaði. Verkefnið hefur verið tilnefnt til viðskiptaverðlauna Somerset 2012.
(Sjá frétt EDIE í gær).

Hækkun sjávarborðs gleymist í skipulagsáætlunum

Birt þann af
Svara

Um þriðjungur sveitarfélaga í Suður-Svíþjóð tekur ekkert tillit til hækkandi sjávarborðs í skipulagsáætlunum sínum og um 60% af þeim sem taka hækkunina með í reikninginn virðast ekki byggja áætlanir sínar á traustum grunni. Þetta kemur fram í nýrri úttekt Tækniháskólans í Stokkhólmi (KTH) og Rannsóknamiðstöðvar öryggis- og varnarmála (FOI). Strandsvæði verða sífellt vinsælli til búsetu og algengt er að hafnarsvæði séu tekin undir íbúðabyggð án tillits til hækkandi sjávarstöðu.
(Sjá frétt á heimasíðu KTH 31. október).

Bensín úr andrúmslofti

Birt þann af
Svara

Sérfræðingum hjá breska fyrirtækinu Air Fuel Synthesis (AFS) hefur fyrstum manna tekist að framleiða bensín í umtalsverðu magni úr andrúmslofti. Lofti er þá blásið í gegnum súlu sem inniheldur vítissóda. Koltvísýringur úr loftinu binst sódanum og myndar natríumkarbónat, en er síðan losaður aftur með rafgreiningu og látinn hvarfast við vetni, sem fengið er með rafgreiningu á vatni. Þannig fæst syngas sem unnið er í metanól og síðan bensín. Verkefnið er komið á það stig að rætt er um byggingu verksmiðju til að framleiða bensín af þessu tagi í stórum stíl. Framleiðslan getur tekið mið af framboði á raforku á hverjum tíma og þannig nýst sem orkugeymsla, umfram hið hefðbundna hlutverk eldsneytis. Ef raforkan er af endurnýjanlegum uppruna telst eldsneytið kolefnishlutlaust.
(Sjá frétt EDIE 15. október).

Samdráttur í losun fylgir ekki samdrætti í landsframleiðslu

Birt þann af
Svara

Losun gróðurhúsalofttegunda eykst á hagvaxtarskeiðum, en minnkar ekki að sama skapi á samdráttarskeiðum ef marka má rannsókn Richards York við Háskólann í Oregon, byggða á hagvaxtartölum 150 þjóða á tímabilinu 1960-2008. Koltvísýringslosun jókst að meðaltali um 0,73% fyrir hvert 1% aukinnar landsframleiðslu, en drógst saman um 0,43% þegar landsframleiðslan minnkaði um 1%. Því er sem sagt ekki að treysta að álag á umhverfið minnki sjálfkrafa í takt við efnahagslegan samdrátt.
(Sjá nánar í frétt PlanetArk í gær).

Leigubílar á grænu eldsneyti fá forgang á Arlanda

Birt þann af
Svara

Frá því í júlí 2011 hafa allir leigubílar sem aka frá Arlandaflugvelli við Stokkhólm þurft að uppfylla skilgreiningu stjórnvalda á grænum bílum. Nú hyggst Swedavia sem sér um rekstur flugvallarins hins vegar ganga skrefi lengra til að ýta undir orkuskipti í samgöngum. Framvegis fá leigubílar sem ganga fyrir visthæfu eldsneyti forgang í biðröðinni utan við flugvöllinn, umfram hina „grænu leigubílana“.
(Sjá nánar í fréttatilkynningu Swedavia 21. sept. sl).

Noregur er rafbílaland nr. 1

Birt þann af
Svara

Noregur er rafbílaland nr. 1 samkvæmt nýrri skýrslu frá sænsku samtökunum Gröna bilister. Það sem af er árinu hafa rúmlega 2.500 rafbílar verið seldir í Noregi, þar af 463 í ágúst (3,5% af öllum nýskráningum). Helstu ástæður þessarar miklu velgengni eru sagðar vera markvissar aðgerðir norskra stjórnvalda. Þar eru rafbílar undanþegnir virðisaukaskatti og skráningargjöldum, greiða lægri bifreiðagjöld, mega nota forgangsakreinar, greiða lægri eða enga vegtolla og fá ókeypis í bílastæði og bílaferjur. Hið opinbera styður einnig við uppbyggingu hleðslustöðva og annarra innviða, auk þess sem þeir sem aka rafbílum fá greidd hærri kílómetragjöld og 50% afslátt af skatti á bílahlunnindi.
(Sjá nánar í frétt á heimasíðu Gröna bilister í gær).

Nestlé til fyrirmyndar í loftslagsmálum

Birt þann af
3

Matvælafyrirtækið Nestlé er hæst á árlegum lista samtakanna Carbon Disclosure Project yfir frammistöðu 500 stærstu fyrirtækja heims í loftslagsmálum. Við röðun á listann er skoðað hvernig fyrirtækin taka tillit til loftslagsbreytinga í áætlunum sínum, hvernig þau mæla losun gróðurhúsalofttegunda, hversu gagnsæjar upplýsingar frá þeim eru og hvaða aðgerða þau hafa gripið til í því skyni að draga úr losun. Frá árinu 2001 hefur Nestlé tekist að helminga losun gróðurhúsalofttegunda á hvert tonn framleiðslu. Þá hafa aðgerðir Nestlé í Mexíkó vakið sérstaka athygli, en þar koma 85% af allri raforkunotkun fyrirtækisins frá vindmyllugarði.
(Sjá nánar í frétt EDIE 14. sept. sl).

Verslunarkeðja með eigið orkuver

Birt þann af
Svara

Breska verslunarkeðjan Waitrose áformar að taka þriðja orkuver keðjunnar í notkun á næsta ári. Þetta orkuver verður ólíkt þeim tveimur fyrri að því leyti að hráefni verður eingöngu sótt í eigin úrgang keðjunnar, svo sem vörubretti og steikingarfeiti. Einnig verður notað timbur sem til fellur við niðurrif ónýtra rúma sem vipskiptavinir skila inn til verslananna. Bómull og önnur verðmæt efni úr rúmunum eru hins vegar nýtt í nýja framleiðslu. Hið nýja orkuver er liður í að gera verslunarkeðjuna sjálfa sér nóga með orku og ná markmiði um 15% samdrátt í losun gróðurhúsalofttegunda fyrir árið 2021.
(Sjá nánar í frétt EDIE í gær).

Kínverjar setja 39.000.000.000.000 kr. í orkusparnað

Birt þann af
Svara

Kínversk stjórnvöld kynntu á dögunum þá fyrirætlan sína að setja jafnvirði 372 milljarða bandaríkjadala (um 39 þús. milljarða ísl. kr.) í verkefni til að bæta orkunýtingu í landinu. Þetta er liður í áætlun Kínverja um að minnka orkunotkun á hverja framleiðslueiningu í iðnaði um 21% milli áranna 2010 og 2015 og að draga úr losun gróðurhúsalofttegunda á hverja einingu í landsframleiðslu um 40-45% milli áranna 2005 og 2020. Hvað sem þessum áformum líður jókst heildarlosun gróðurhúsalofttegunda í Kína um 9% á síðasta ári og nemur nú 29% af losun á heimsvísu.
(Sjá nánar í frétt PlanetArk 23. ágúst sl).