Greinasafn fyrir flokkinn: Orka

Innviðir fyrir vetni byggðir upp í London

Birt þann af
Svara

Vetnisstöð EDIEÁ næstu þremur árum verður fyrsta samhæfða vetniskerfi Bretlands byggt upp í London. Miðpunkturinn í kerfinu verða nokkrar áfyllingarstöðvar fyrir vetnisbíla, þar sem vetni af endurnýjanlegum uppruna verður afgreitt með 700 bara þrýstingi. Jafnframt verða eldri stöðvar uppfærðar í 700 bör til að mæta fyrirsjáanlegri þróun vetnisbíla. Uppbygging kerfisins er samstarf nokkurra aðila, en verkefnið gengur undir nafninu London Hydrogen Network Expansion (LHNE). Í verkefninu felst einnig útvegun vetnisbíla, m.a. fólksbíla af Hyundai-gerð og Revolve sendibíla. Með tilkomu kerfisins verða vetnisknúnir flutningar að raunhæfum möguleika í London. Aðstandendur verkefnisins vonast til að það nýtist sem sýnidæmi og fyrirmynd annarra vetniskerfa sem byggð verða upp í Bretlandi og annars staðar í Evrópu í framtíðinni.
(Sjá frétt EDIE 30. janúar).

Fimmföld orka í hallandi víði

Birt þann af
Svara

130118125950Víðir sem hallast, t.d. vegna stöðugs vindálags, getur gefið af sér allt að fimmfalt meira lífeldsneyti en sams konar tré sem vex upprétt. Þessi aukna framleiðni er erfðafræðilegur eiginleiki sem mörg víðitré virðast búa yfir, og er virkjaður ef trén eru neydd til að vaxa skáhallt. Hallinn leiðir til þess að trén framleiða meira af sykrum í stofninum í viðleitni sinni við að rétta sig upp. Víðir er víða ræktaður sem orkugróður og því getur þessi uppgötvun haft verulega þýðingu fyrir framleiðslu á vistvænu eldsneyti. Uppgötvunin er afrakstur samstarfs breskra vísindamann á þessu sviði.
(Sjá frétt Science Daily 18. janúar).

Raforkuframleiðsla hafin í London Array

Birt þann af
Svara

Raforkuframleiðsla er hafin í London Array vindmyllugarðinum sem verður stærsta vindorkuverið í höfum heimsins þegar hann er kominn í full afköst. Búið er að setja upp 151 vindmyllu í garðinum, sem er staðsettur í óshólmum Thames-árinnar úti fyrir Kent og Essex. Stefnt er að því að samanlagt uppsett afl garðsins verði 870 megavött þegar upp er staðið. (Til samanburðar má nefna að uppsett afl Kárahnjúkavirkjunar er 690 MW).
(Sjá frétt The Guardian í gær).

Bensín úr andrúmslofti

Birt þann af
Svara

Sérfræðingum hjá breska fyrirtækinu Air Fuel Synthesis (AFS) hefur fyrstum manna tekist að framleiða bensín í umtalsverðu magni úr andrúmslofti. Lofti er þá blásið í gegnum súlu sem inniheldur vítissóda. Koltvísýringur úr loftinu binst sódanum og myndar natríumkarbónat, en er síðan losaður aftur með rafgreiningu og látinn hvarfast við vetni, sem fengið er með rafgreiningu á vatni. Þannig fæst syngas sem unnið er í metanól og síðan bensín. Verkefnið er komið á það stig að rætt er um byggingu verksmiðju til að framleiða bensín af þessu tagi í stórum stíl. Framleiðslan getur tekið mið af framboði á raforku á hverjum tíma og þannig nýst sem orkugeymsla, umfram hið hefðbundna hlutverk eldsneytis. Ef raforkan er af endurnýjanlegum uppruna telst eldsneytið kolefnishlutlaust.
(Sjá frétt EDIE 15. október).

Staðbundnir gjaldmiðlar skapa ný tækifæri

Birt þann af
Svara

Belgar sem fara sparlega með orku geta nú fengið umbun í formi sérstaks gjaldmiðils sem aðeins er hægt að nota til kaupa á umhverfisvænni vöru eða þjónustu í heimabyggðinni. Þar með er orðinn til tvöfaldur hvati til sparnaðar, því að orkureikningurinn lækkar að sjálfsögðu líka. Þetta er hluti af verkefninu INESPO (Innovative Instruments for Energy Saving Poilicies), sem hefur það m.a. að markmiði að draga úr óþarfri orkunotkun og stuðla að breyttri neysluhegðun. Staðbundnir gjaldmiðlar hafa víða verið teknir í notkun, en belgíska dæmið er sérstakt að því leyti að það tengist uppsetningu snjallmæla sem sýna hvar og hvenær orkan er notuð og gefa möguleika á hagstæðari orkukaupum þar sem verð er breytilegt eftir álagi.
(Sjá nánar í frétt á heimasíðu sænska ríkisútvarpsins 3. október).

Eingöngu díóðuljós í IKEA 2016

Birt þann af
1

Frá og með árinu 2016 munu hvorki glóperur né sparperur fást í verslunum IKEA, heldur eingöngu díóðuljós (e. light-emitting diodes (LED)). Með þessu gengur IKEA lengra en gerð er krafa um, en sem kunnugt er hefur innflutningur á glóperum af tilteknum styrkleika verið bannaður í löndum ESB. Díóðuljós eru enn talsvert dýrari en glóperur og sparperur, en þau eiga að geta enst í u.þ.b. 20 ár, þurfa mjög litla orku miðað við ljósmagn og innihalda ekki kvikasilfur. Líklegt má telja að ákvörðun IKEA flýti fyrir því að díóðuljós verði fáanleg í góðu úrvali og á viðráðanlegu verði, umhverfi og efnahag til hagsbóta.
(Sjá nánar í fréttatilkynningu IKEA í Svíþjóð 1. október).

Vindaflið komið í 100 GW

Birt þann af
Svara

Framleiðslugeta vindorkustöðva í löndum ESB fór á dögunum yfir 100 gígavatta (GW) markið. Þetta samsvarar afli 39 kjarnorkuvera og dugar til að fullnægja raforkuþörf 57 milljóna heimila. Til samanburðar má nefna að samanlagt afl allra virkjana á Íslandi er innan við 3 GW. Þróunin í virkjun vindorku hefur verið mjög hröð. Þannig tók um 20 ár að komast upp í 10 GW, en aðeins 13 ár að bæta 90 GW við. Helmingurinn af þessum 100 GW var settur upp á síðustu 6 árum.
(Sjá nánar í frétt á heimasíðu European Wind Energy Association (EWEA) 27. september).

Nissan og Fortum setja upp 50 hraðhleðslustöðvar

Birt þann af
Svara

Bílaframleiðandinn Nissan og orkufyrirtækið Fortum hafa gengið frá samstarfssamningi um uppbyggingu innviða fyrir hraðhleðslu rafbíla. Settar verða upp 50 stöðvar á vel völdum stöðum við aðalvegi milli höfuðborga Norðurlandanna. Gert er ráð fyrir að á þessum stöðvum verði hægt að hlaða rafbíl á borð við Nissan LEAF upp í 80% á 20 mínútum. Verkefnið er liður í þróun Charge-and-drive hugmyndarinnar sem Fortum hefur unnið að um nokkurt skeið.
(Lesið fréttatilkynningu á vefsíðu Dagens Industri í gær).

Viskíúrgangur verður að eldsneyti

Birt þann af
Svara

Hliðarafurðum úr viskíframleiðslu verður breytt í eldsneyti samkvæmt nýju samkomulagi viskýframleiðandans Tullibardine og sprotafyrirtækisins Celtic Renewables, sem þróað hefur tækni til að vinna bútanól úr lífrænum úrgangi. Verkefnið er hið fyrsta sinnar tegundar í heiminum. Zero Waste Scotland styrkir verkefnið um 155.000 sterlingspund (um 31 milljón ísl. kr.), en enn hærri upphæð sparast árlega í lægri förgunargjöldum. Stefnt er að framleiðslu á allt að 10.000 lítrum af bútanóli, sem er þó aðeins örlítið brot af því sem gæti orðið ef allir skoskir viskýframleiðendur legðu saman.
(Sjá frétt EDIE í gær).

Nestlé til fyrirmyndar í loftslagsmálum

Birt þann af
3

Matvælafyrirtækið Nestlé er hæst á árlegum lista samtakanna Carbon Disclosure Project yfir frammistöðu 500 stærstu fyrirtækja heims í loftslagsmálum. Við röðun á listann er skoðað hvernig fyrirtækin taka tillit til loftslagsbreytinga í áætlunum sínum, hvernig þau mæla losun gróðurhúsalofttegunda, hversu gagnsæjar upplýsingar frá þeim eru og hvaða aðgerða þau hafa gripið til í því skyni að draga úr losun. Frá árinu 2001 hefur Nestlé tekist að helminga losun gróðurhúsalofttegunda á hvert tonn framleiðslu. Þá hafa aðgerðir Nestlé í Mexíkó vakið sérstaka athygli, en þar koma 85% af allri raforkunotkun fyrirtækisins frá vindmyllugarði.
(Sjá nánar í frétt EDIE 14. sept. sl).