Greinasafn fyrir merki: Skotland

Sjávarfallavirkjun í Pentlandfirði

Birt þann af
Svara

Pentland

Í síðustu viku veitti skoska ríkisstjórnin fyrirtækinu MeyGen Ltd. leyfi til að hleypa af stokkunum stærsta sjávarfallaorkuverkefni í Evrópu í Pentlandfirði milli Orkneyja og meginlands Skotlands. Fyrsta skrefið í verkefninu felst í byggingu 9 MW tilraunavirkjunar, en ætlunin er að virkjunin verði 86 MW þegar upp er staðið. Virkjun af þeirri stærð ætti að geta séð 42.000 heimilum fyrir raforku. Pentlandfjörður er talinn henta einstaklega vel til virkjunar sjávarfallaorku, en menn greinir nokkuð á um raunverulega framleiðslugetu.
(Sjá frétt PlanetArk 17. september).

Skotar byggja 40 MW sjávarölduvirkjun

Birt þann af
Svara

OysterSkosk stjórnvöld hafa veitt orkufyrirtækinu Aquamarine leyfi til að hefja uppsetningu á ölduvirkjun við norðvesturströnd Lewis eyju (g. Leòdhas (Ljóðhús)) við Skotland. Þar er ætlunin að setja upp 40-50 „ostruvélar“ með samanlagt afl upp á 40 MW. Rafmagn frá virkjuninni ætti að nægja u.þ.b. 30.000 heimilum. Gert er ráð fyrir að verkið taki nokkur ár, en áður en hafist er handa við uppsetningu vélanna þarf að byggja upp aðstöðu og tengingar á landi. Virkjunin, sem verður stærsta ölduvirkjun í heimi, verður í grennd við bæinn Fivepenny Borve, en þar er talinn vera einn hagstæðasti ölduvirkjunarstaður í Evrópu.
(Sjá frétt EDIE 23. maí).

Viskíúrgangur verður að eldsneyti

Birt þann af
Svara

Hliðarafurðum úr viskíframleiðslu verður breytt í eldsneyti samkvæmt nýju samkomulagi viskýframleiðandans Tullibardine og sprotafyrirtækisins Celtic Renewables, sem þróað hefur tækni til að vinna bútanól úr lífrænum úrgangi. Verkefnið er hið fyrsta sinnar tegundar í heiminum. Zero Waste Scotland styrkir verkefnið um 155.000 sterlingspund (um 31 milljón ísl. kr.), en enn hærri upphæð sparast árlega í lægri förgunargjöldum. Stefnt er að framleiðslu á allt að 10.000 lítrum af bútanóli, sem er þó aðeins örlítið brot af því sem gæti orðið ef allir skoskir viskýframleiðendur legðu saman.
(Sjá frétt EDIE í gær).

Flokkað á skokkinu

Birt þann af
Svara

Ríkisstjórn Skotlands stofnaði á dögunum sjóð upp á 500.000 sterlingspund (um 96 milljónir ísl. kr.) til að stuðla að bættri flokkunaraðstöðu á almannafæri í skoskum byggðum. Mikill árangur hefur þegar náðst í flokkun úrgangs á heimilum, og því telja Skotar einsýnt að það sama eigi að geta gilt um fjölfarna staði utandyra. Takist að ná flokkunarhlutfallinu upp í 70% fyrir árið 2025 er talið að það samsvari 178 milljóna sterlingspunda (um 34 milljarða ísl. kr.) innspýtingu í hagkerfið. Landeigendur, sveitarfélög og rekstraraðilar geta sótt um framlög úr hinum nýja sjóði til að koma upp aðstöðu fyrir „Recycle on the Go„, þ.e. til flokkunar á skokkinu.
(Sjá nánar í frétt EDIE 28. ágúst sl).